DILI, STLTIMORLESTE.com – Fulan Outubru Timor Leste (TL) sai membru full ba ASEAN, husu feto sira nafatin kapasita aan hodi inklina iha atividade hotu bainhira TL hola parte iha membru.
Kestaun nee hatoo husi Diretor Nasional Dezenvolvimentu Igualidade Jeneru husi SEI, Jose do Rosario de Carvalho ba jornalista STL iha Delta Nova, Kuarta nee (28/05/2025) hatete, fulan Outubru Timor Leste adere ona ba ASEAN no oras nee iha feto kualidade barak oinsa mak hola parte no SEI mos nafatin kolabora ho parte hotu oinsa kapasita feto atu partisipa ativu iha atividade hotu bainhira TL adere ba ASEAN.
“Ita hatene katak liga ho asuntu parte ASEAN nia iha fulan Outubru tinan nee ita nia nasaun Timor Leste adere ba ASEAN hola parte hanesan nasaun ASEAN, iha feto barak kualidade oinsa hola parte, no husi parte Sekretariu Estadu Igualidade nafatin kolabora ho parte kompetente sira liu-liu MNEK oinsa mak iha formasaun sira, no oras nee MNEK mos rekruta ona funsionariu husi Ministeriu rasik inklui feto matenek sira oinsa iha preparasaun atu halo formasaun no kapasitasaun para aban bainrua hola parte iha atividade ASEAN ho diak ho kualidade,” katak Diretor Nasional SEI.
Iha biban nee nia mos husu ba feto sira nafatin iha komitmentu atu prontu kompete iha kualker atividade. No labele minimiza aan maibe buka partisipa iha formasaun oin-oin atu nafatin kapasita ho kualidade.
Nunee mos Feto Potensial Yasinta Lujina hanesan mos Adjunta Gabinete Apoiu Sosiedade Civil hatete, parabens ba Governu no parte hotu nia esforsu tinan naruk nia laran, nunee iha fulan Outubru Timor Leste sai membru full ASEAN.
“Hau hanoin preparasaun sai membru ASEAN nee esforsu sira neebe iha liu-liu sosiedade sivil halo iha tempu naruk no ita mos hatene Governu mos prepara tempu naruk ona, parabens ba estadu nia esforsu hamutuk ho parte hotu-hotu ho nia konsiderasaun tinan ida nee hola parte ona sai membru ASEAN, hau fiar katak ema hotu-hotu, liu-liu feto sira mos sai hanesan nasaun ida neebe mak ita nia performe ida neebe mak bele aprende husi ita, tanba ita nasaun iha ASEAN neebe promove feto makaas boot iha Parlamentu Nasional nee so ita, entaun ida nee sira bele aprende husi ita, oinsa politika estadu nia ita nia lei sira neebe garante nomos esforsu sira neebe feto sira iha hodi bele prienxe no lidera iha estadu ida nee,” katak.
Hakarak partisipasaun feto laos iha nivel publiku no politiku deit, maibe iha setor hotu-hotu oinsa feto mos bele partisipa involve no bele hetan benefisiu iha setor oin-oin.
Fiar katak ho envolvimentu ASEAN neebe nakloke ona ita mos bele kompete no hola parte iha nivel sira neebe mak laos deit iha komunidade Estadu Timor nia maibe ita mos hamutuk ho estadu membru ASEAN sira ita bele kolabora servisu neebe ho setor diferente sira nee, ba sosiedade sivil hau hanoin feto servisu makaas ona iha nivel oin-oin iha advokasia sira halo buat barak ona haforsa feto,” katak Yasinta.
Nia mos fiar katak servisu ba oin nee sei sai diak no bele haree nia rezultadu iha tempu sira tuir mai.
Nunee mos Diretora Interina Fundasaun Caucus Feto ba Politika, Julieta Fereira da silva hatete, iha fulan Outubru Timor Leste sai ona membru full ASEAN, tanba nee husu feto sira nafatin prepara aan hodi kompete ho mane sira.
“Agora ita tama ona ba membru ASEAN ita husu ba feto maluk hotu-hotu bele asesu ba informasaun bele tuir formasaun oin-oin para bele hatene no bele kompete iha nasaun ita nia nomos iha nasaun seluk, ida nee mak ita nia esperansa,” katak Diretora Interina Fundasaun Caucus.
(eme)
