DILI, STLTIMORLESTE.com – Prezidente Autoridade (PA) Rejiaun Administrativa Espesiál Oekusi-Ambeno (RAEOA). Rogeiro Tiago Lobato ho Primeiru Ministru (PM) Kay Rala Xanana Gusmão diskute kona-ba oinsa atu kria kondisoes diak ba joven sira bele fila liman, bele kria sira nia servisu rasik, nunee hatudu katak sira mos manan osan, laos depende ba estadu deit, sira ba servisu ba sira nia aan mos bele manan osan.
Lia hirak nee hatoo husi Prezidente Autoridade RAEOA, Rogeiro Tiago Lobato, wainhira hasoru malu ho Primeiru Ministru Kay Rala Xanana Gusmão iha Palasiu Governu, Dili, Tersa (03/06/2025).
“Hau kontente tebes-tebes tanba iha vizaun ida oin seluk para ita bele kria kondisoes ba joven sira hodi komesa sai, laos sai haree deit maibe sira bele sai partisipa iha dezenvolvimentu Timor nian,” katak nia.
Prezidente Autoridade RAEOA, Rogeiro Tiago Lobato hateten, joven sira neebe remata ona iha Universidade labele depende deit ba iha estadu hodi sai hanesan empregador prinsipal.
“Ohin ami diskute mos kona-ba oinsa atu kria ambiente ida neebe mak ita nia joven sira kuandu sai ona husi Universidade labele depende deit ba iha estadu hanesan empregador prinsipal,” tenik nian.
Nia dehan, oras nee joven barak mak mai hakarak servisu tur iha kadeira, servisu iha kantor, maibe oinsa mak ita tenke kria kondisoes para joven sira mos iha vontade atu servisu iha agrikultura no vontade atu servisu iha area oin-oin neebe mak iha.
Mezmu nunee, atu partisipa dezenvolvimentu Timor nian ita tenke fo meius ba sira, sira nia inisiativa hakarak atu hakiak animal maibe nia modal ka osan laiha, estadu bele apoiu inisiativa ida nee.
“Estadu bele tau osan iha banku depois osan nee estadu nian ita bele fo kreditu ba se deit mak iha atu dezenvolve nia atividade iha setor privadu ho funan ida neebe kiik, buat sira nee mak ita presiza diskute, presiza koalia para bele hetan solusaun diak ba ita nia rai,” katak nian.
Klaru katak iha rekursus umanus neebe mak iha problema boot, ita iha joven barak estuda iha universidade iha Timor, maibe nia kualidade nee oinsa, importante mak nee.
“Iha Oekusi ami hanoin atu haruka joven balun ba estuda iha rai liur, la kleur tan turizmu bele sai ona iha Oekusi, sei halo hotel, hau sente katak iha fulan neen (6) ou fulan hitu (7) tan bele hetan hotel ho kuartu atus haat ou atus lima nian,” nia dehan.
EST 1
