AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu liu husi enkontru alargamentu hamutuk ho Diretor Jeral, Diretor Rejional nomos ho funsionariu publiku husi kada diresaun, ofisialmente deklara desmantela ou hapara total funsionamentu media officer sira neebe durante nee halao servisu iha kada diresaun rejional inklui PA-RAEOA Sesante.
“Hau deklara katak, desmantela hotu servisu media komunikasaun husi autoridade sesante, efetivu hahu loron 1 Setembru 2025, neebe iha kompetensia tomak atu retoma ida nee, nunee ita koloka serbisu sira neebe nesesita duni. Pajina ofisial media RAEOA, hau sei remodela, ita sei estabelese serve ida, atu ita serbisu ho kaman, tanba ita sei barak liu serbisu iha terrenu, 40% tenke iha edifisiu laran,” dehan PA-RAEOA, liu husi enkontru alargada ho funsionariu publiku iha salaun Administrasaun Numbei, Aldeia Sanane, Suku Costa, Postu Administrativu Pante Makasar, RAEOA, Kinta (4/9/2025).
Iha biban nee, PA-RAEOA rekomenda ba Diresaun Rejional Patrimoniu Estadu no Lojistika, presiza alista fasilidade no ekipamentu kada diresaun asegura ona.
“Iha sirkular neebe hau sei fo sai, artigu 3, hau hakotu ona, unidade media neebe eziste, kria iha mandatu anterior. Hau husu ba Diresaun Patrimoniu Estadu no Lojistika, dada fila fali aparelu media sira nee, atu haree komunikasaun neebe dignu, defende Estadu no povu nee ho kanalizadu,” nia dehan.
Otelio Ote Asume Knaar Senior Komunikasaun Sosial Oecusse.
Iha biban nee, PA-RAEOA, ofisalmente anunsiu ba publiku, Eis Prezidente Konselhu Imprensa Timor Leste, (KI), Otelio Ote, asume knaar Senior Komunikasaun Sosial nian iha Oecusse.
“Hau imediatamente, husu no bolu Otelio Ote, nuudar Eis-Prezidente Konselhu Imprensa Timor-Leste, atu sai hanesan senior tekniku ba politika komunikasaun sosial, hodi foku liu atu promove Oecusse, laos atu taka ema nia media no laos atu taka ema asesu ba media sosial sira, laos atu taka ema nia direitu atu espresa nia kritiku, nunee bele ajuda estadu no governu inklui lider sira, asegura boa governasaun,” nia hateten.
Iha biban nee, Otelio Ote iha konversa ho jornalista media nasional destakadu iha Oecusse kompostu husi RTTL. E.P, STL Corp no Radio Komunidade Atoni Oecusse (RCAL) katak, iha Oecusse presiza kria media Estatal Rejional ida iha Oecusse nuudar fundasaun ida ba planu governu iha desentralizasaun poder lokal, nunee bainhira estabelese ona media fo influensia ba publiku no promove Oecusse liu husi media estatal nee, hodi promove boa governasaun ba serbisu Autoridade iha futuru maibe ida nee sei trasa hela planu tuir matadalan neebe fo iha tranzisaun nee.
Jornalista: Joseph Koa
Editor: Joseph Koa
