AMBENO, STLTIMORLESTE.com – Prezidente Autoridade Rejiaun Administrativa Espesial Oekusi-Ambeno (PA-RAEOA), Rogerio Tiago de Fatima Lobato ho Koordenador Komisaun Ezekutivu Zona Ekonomika Espesial ba Dezenvolvimentu Oekusi-Ambeno (KE-ZEEDOA), Joao Mendes Goncalves akompanha husi Sekretariu Rejional sira hotu iha Oekusi, ofisialmente halao ona lansamentu ba kolesaun Pre-Fabrika Au iha Oefoko, Aldeia Fatubijae, Suku Bobokase, Postu Administrativu Pante Makasar Oekusi.
Tuir Sabino Ruas nuudar Koodenador Au husi KE-ZEEDOA), hatoo agradesimentu ba Prezensa PA-RAEOA ho KE-ZEEDOA nomos Sekretariu Rejional sira iha ambitu lansamentu kolesaun Pre-Au iha Oefoko, tanba dadauk nee iha ona makina tesi au no fera au no ohin ofisialmente sei halo sei haruka au husi husi Oecusse ba Sentru Au Likisa.
“Hau hakara releta ba autoridade RAEOA, KE-ZEEDOA ho Sekrataria Rejional sira ba progresu servisu durante nee ami hahu ho orsamentu ida neebe minimu tebes ho montante osan hamutuk US$ 800 resin. Osan hirak nee ami sosa komunidade sira nia auo iha Suku Monemeko no sei sei kontinua sosa iha Kutete, tanba nee sei fo benefisiu ba komunidade Oecusse iha futuru,”dehan nia.
Iha biban nee, nia husu ba Prezidente autoridade RAEOA, apoiu netik fundus ba gropu au Oefoko, atu nunee bele haforsa sira nia kapital hodi haluan atividade au nee.
“Prezensa pre-fabrika au iha Oekusi, komunidade sira kontete, tanba iha Oekusi Au barak, maibe la folin no balun komunidade sira tesi no sunu arbiru deit,” afirma nia.
Nia esklarese, prosesu estabelesimentu Pre-Fabrika Au nee, inisia hahu hatoo pedidu ida iha Instituto Au I,P atu apoiu au-oan hamutuk rihun 4, maibe kuda deit au oan rihun 2 iha Bee matan ida Oefoko, dadaun nee moris hotu.
Iha biban nee, Diretor Ezekutivu Instituto do Au I.P. Abilio I.A. Barros, agradese ba Autoridade RAEOA no KE-ZEEDOA neebe iha politika ida neebe diak tebes, hakara dezenvolve no promove produtu au ho valor ekonomiku neebe boot iha RAEOA.
Nia husu ba PA-RAEOA, atu fasilita sira atu lori au husi Oekusi liu husi ro atu transporta ba Centru Au iha Likisa.
Iha oportunidade nee, KE-ZEEDOA, Joao Mendes Goncalve agradese ba PA-RAEOA neebe maka apoiu KE-ZEEDOA liu husi investimentu au iha Oecusse, tanba investimentu au nee bele halo buat oi-oin, hanesan aihan, mobiliariu no buat seluk-seluk tan.
“Ita hotu hatene katak, iha rai Timor kada tinan sempre preokupa ho bee maran, tanba nee ita sei organiza povu husi Pantemakassar, Nitibe, Pasabe no Oesilo atu kuda au hodi proteze rai halai, nunee mos au bele proteze bee matan sira inklui fo benefisiu ekonomikamente ba povu kada tinan iha futuru,” dehan nia.
Iha oportunidade nee, PA-RAEOA, Rogerio Tiago de Fatima Lobato, aprezia ba inisiativa investimentu au iha Oecusse.
“Hau husu atu prepara proposta ida, diriji ba Gabinete RAEOA, hodi nunee ita apoiu, osan iha no hau prontu atu apoiu 100% ba inisiativa ida nee no sei apoiu, tanba nee husu atu lalais hatama proposta, ita boot sira nia presiza osan hira atu apoiu, Autoridade prontu apoiu,” dehan nia.
Atividade lansamentu nee partipa husi Prezidente Autoridade RAEOA, Koordenador ZEEDOA, Sekretariu Rejional Administrasaun, Sekretariu Rejional Terras Propriedade, Sekretariu Rejional Saude, Sekretaria Rejional Agrikultura, Diretor Rejional sira, Xefe Gabinete sira, Komandante Eskuadra Pante Makasar, Xefe Suku Lalisuk, Xefe Suku Monemeko, Xefe Suku Naimeko, Xefe Suku Kutete no Komunidade iha Bairru Oefoko.
(jos)
