AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA-RAEOA), Regio da Cruz Salu, iha enkontru dahuluk ho Funsionariu Agrikultura, akompanha husi Prezidente Kamara Komersiu Industria Timor Leste RAEOA, husu atu apoiu Governu hodi hasae produsaun ai-haan iha rai laran, orienta ba merkadu.
“Ohin hau mai halao enkontru ho Setor no sub-setor produsaun aihan alimentar no ekonomia, hau mai hamutuk ho CCI-TL RAEOA, Frederico Texeira hamutuk ho Diretor Rejional Agrikultura, Jose Oki nomos Diretor Rejional Planeamentu, Agustinho Efi, laos mai atu fo motivasaun maibe mai informa katak, ita mai ho pajina foun, re-orientasaun foun nee labele husik ita nia povu labele hamlaha nomos ho Zona Ekonomia Sosial, ita labele kontinua nafatin hanesan ema dehan katak, Oecusse ho total popupuasaun neebe maka maioria moris ho vida agrikultura maibe 1% maka produs aihan husi agrikultura, neebe tenkiser alerta nomos ita tenke re-estrutura fila fali mekanizmu institusional agrikultural, atu ita asegura setor produsaun agrikultura neebe ke asegura seguransa alimentar ba ita nia povu nomos asegura soberanu aihan ba ita nia Ekonomia rasik,” dehan PA-RAEOA, Regio da Cruz Salu, hafoin halao enkontru dahuluk ho Funsionariu Agrikultura RAEOA iha edifisiu Ministeriu Agrikultura Peskas Orta, Bairru Santa Rosa Oecusse, Sesta (5/9/2025).
Nia haktuir tan katak, potensia Oecusse maka agrikultura, entaun liu husi enkontru nee, re-voka foku ba iha estratejia intervensaun institusional neebe nesesita, atu nunee bele re-mobiliza aspeitu iha agrikultural tomak dinamizada ho kultuprazu nee ho orsamentu jeral estadu tinan 2025, sai obrigasaun atu ezekuta bazeia programa, maibe orientasaun neebe ho matadalan neebe ke loos, depois fulan tolu nee.
Iha oportunidade hanesan, Diretor Rejional Agrikultura, Jose Oki dehan, liu husi orientasaun neebe PA-RAEOA ohin fo nee para oinsa, teknikamente forma ekipa tekniku atu bele tau iha prioridade ba orientasaun neebe halai liu ba iha setor ekonomia.
“Liu husi orientasaun neebe PA-RAEOA ohin fo nee para oinsa, teknikamente ami forma ekipa tekniku para bele tau iha prioridade ba orientasaun neebe halai liu ba iha setor ekonomia, hanesan produsaun hare, hare metan depois pequaria hanesan karau, bibi, depois produtu maek, hasae area floresta nomos area seluk-seluk tan neebe maka ami sei identifika para bele tau importansia, tanba nee sei kria ekipa iha tempu badak hodi re-orienta iha semana ida nia laran, atu nunee ekipa nee tun ona iha terenu hodi identifika setor agrikultura, nunee relata ba PA-RAEOA atu bele impleamenta iha tempu badak ida nee, neebe ami asegura hodi fo resposta ba tempu neebe maka fo mai ami atu relata ba PA-RAEOA,” dehan nia.
Iha oportunidade hanesan, Prezidente CCI-TL RAEOA, Frederico Texeira dehan, ohin PA-RAEOA halao ninia atividades reuniaun dahuluk ho Diretor Rejional Agrikultura hamutuk funsionariu agrikultura, partisipa husi CCI-TL RAEOA sai nuudar parseiru prinsipal iha setor ekonomia TL, espesialmente iha Oecusse.
“Ami husi CCI-TL RAEOA nuudar setor privadu, ami prontu atu kolabora no serbisu hamutuk ho PA-RAEOA liu-liu ho Diretor Rejional Agrikultura, foku liu ba setor agrikola, atu hasae produsaun nomos prosesamentu atu ita hateke ba iha merkadoria, tanba nee hau sei koalia klean liu tan ho Diretor Rejional Agrikultura kona ba pontus 13 neebe ami iha, atu nunee ita nia area natar neebe maka boot teb-tebes iha Oecusse maibe ita so uza deit metade nee. Tanba nee hau prontu lori investor balu atu mai Oecusse hodi investe iha seto agrikola,” dehan, Frederico Texeira nuudar Prezidente CCI-TL RAEOA.
Jornalista: Joseph Koa
Editor: Joseph Koa
