DILI, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (PA RAEOA), Regio da Cruz Salu akompanha husi Koordenaddor Executiva Zona Ekonomika Espesial ba Dezenvolvimentu Oecusse Ambeno (KE ZEEDOA), Herculano de Sousa liu husi Konfrensia imprensa, ofisialmente anunsiu Kansela Operasaun jogu no apostas Online Oecusse.
Prezidente Autoridade Rejiaun Administrativa Espesial Oecusse Ambeno (PA-RAEOA) Regio da Cruz Salu hatoo deklarasaun nee liu husi konferensia Imprensa obediensia no implementasaun ba rezolusaun governu nu. 54/2025, loron 2 fulan Outubru kona ba kanselamentu ba lisensa operasaun jogu no apostas online, iha gabinete Prezidente Autoridade RAEOA, Oebau, Suku Costa, Postu Administrativa Pantemakassar Oecusse neebe STL asesu husi Gabinete Media Autoridade RAEOA, Tersa (14/10/2025).
“Regio da Cruz Salu nudar porta voz iha konfrensia pers nee hateten, hanesan ita hotu akompanha, rona no hatene ona katak, iha Kinta feira 2 fulan Outubru tinan 2025 liu ba, ita nia IX Governu liu husi desizaun Konselhu Ministru (KM), hasai no publika tiha ona rezolusaun governu nu. 54/2025 hodi halo kanselamentu ba lisensa operasaun Jogus no apostas Online iha Timor leste tomak.
Iha Oecusse-Ambeno rasik antes rezolusaun governu nu. 54/2025 nee anunsia, akontese ona aktus buska de aprensaun iha loron 25 Agustu 2025, neebe koordenadu husi orgaun kompetente estadu Timor Leste (TL) nian ba ativdade ilisitu krime ligadu ba jogus no apostas Online iha Otel Oeupu Oecusse-Ambeno neebe antes buska de aprensaun refere, prezudika no fo prezuizu ba povu Atoni Oecusse-Ambeno rasik husi labarik kiik, feto, mane too ferik no katuas, inklui mos instituisoens sira hotu hanesan Igreja no sosiedade sivil hotu hotu.
Regio dehan, Otel Oeupu – Oecusse Ambeno mak asset ka patrimoniu propriu RAEOA tuir lei nu.3/2014, 18 Junhu, altterada datoluk ho lei nu. 18/2023, 30 Novembru.
Rezolusaun Goveru nu. 54/2025 nee, tama tiha ona em vigor no efetivu emediatamente. Tan nee liu husi konferensia imprensa ida nee, Autoridade RAEOA, Republika Demoratika Timor leste hakarak espresa no deklara nia obrigasaun no obedesimentu ba objetivu no ejizensia governu TL neebe hatuur ona iha rezolusaun governu nu. 54/2025 nee.
Ho nunee maka RAEOA, Republika Demokratika Timor leste hakarak husu no apela ba parte hotu hotu iha RAEOA, liu-liu iha Otel Oeupu, Oecusse-Ambeno neebe identifikadu no hetan ona buska de aprensaun koordenadu iha loron 25 Agustu 2025 liu ba, husi Orgaun kompetente estadu TL nian, ligadu ho atividades ilisitu krime ligadu ba jogus no apostas Online, neebe halao iha Terra de Nossa Senhora do Rosario, Terra de Santa Cruz, Terra de futuru povu Atoni Oecusse-Ambeno, RDTL nian too ohin loron atu hapara, desmantela no hases hanoin no aktus hirak nee sai husi area jusrisdisaun RAEOA Republika Demokratika Timor Leste, hahu kedan husi rezolusaun governu nu.54/2025 loron 2 fulan Outubru kona ba kanselamentu ba lisensa operasaun jogus no apostas Online hahu efetivu.
Nia afirma, Autoridade RAEOA –RDTL hakarak husu no apela mos ba partes potensiais – afiliadus sira seluk, hotu-hotu neebe kunhesimentu, iha afiliasaun no koneksaun direitamente no indireitamente ba atividade ilisitu krime ligadu ba jogus no apostas Online neebe identifikadu no hetan ona buska de aprensaun koordenada iha loron 25 Augustu 2025 liu ba, husi orgaun kompetente estadu Timor leste nian, atu hapara, desmantela no hases mos hanoin no aktus hirak nee sai sai husi area Jusrisdisaun Administrativa RAEOA RDTL, hahu kedan husi Rezolusaun governu nu.54/2025 loron 2 fulan Outubru kona ba kanselamentu ba lisensa operasaun jogus no apostas Online hahu efetivu.
Nia haktuir, Autoridade RAEOA RDTL sei kontinua serbisu hamuuk ho institusaun estadu RDTL relevante, atu observa no superviziona implementasaun ba rezolusaun governu nu. 54 /2025 loron 2 fulan Otubru kona ba kanselamentu operasaun jogus no apostas Online no implementasaun ba objetivu husi konferensia emprensa ida nee.
Autoridade RAEOA RDTL sei kontinua esforsu atu verifika no ho determinasaun haree fila fali aktus no prosedimentais governasaun administra husi autoridade Sesantes neebe ligadu ba dezenvolvimentu neebe halao ona iha Otel Oeupu ho nia koplementaridade institusional dezenvolvimentu ekonomiku ligadu.
Nia dehan, ho planu no inisiu projetu Centro Interpretativa de Historico de Lifau neebe deklaradu tiha ona, respeita no tane nafatin aseitu no valores multidimensionalidade husi Eno Naek ma Nesu Naek Lifau (odanatan boot Lifau) no haree mos aspeitu institusional ligadu ba operasionalidade no funsionamentu ekonomiku Aeroportu Internasional Oecusse-Ambeno ‘Rota do Sandalo, obra no objetivu harii Otel besik kedan iha aredores perimetru besik ba Monumentu Lifau ka Eno Naek ma Nesu Naek Lifau, no ba Aeroportu Internasional de Oecusse Rota do Sandalo, sei muda ba fatin seluk hahu kedan depois de konferensia ida nee.
Prezidente Autoridade Rejiaun Administratia Espesial Oecusse Ambeno (RAEOA) Republika Demokratika Timor Leste hakarak kontinua no apela no husu primeiru ba Entidades no komponente sosial, kultural no politiku hotu-hotu RAEOA nian hodi kumpri no ezerse aderensia no obedesimentu ba objetiu no efeitu husi rezolusaun governu nu. 54/2025 loron 2 fulan Outubru.
“Husu ba Atoni Oecusse oan sira hotu-hotu atu fo liman ba malu, atu koalia ba malu, la haree ba koor no la limite ita nia aan ba malu tanba deit partidu no afiliasaun neebe lahanesan iha tempu no periode kampanha festa demokratiku nian. Maibe nuudar maun alin familia boot husi rain no povu Atoni Oecusse Ambeno deit, ho Nekaf Mese ma Ansaof Mese, ita tenke koalia ba malu, tulun malu, koolabora malu, kona ba ita nia povu no ita nia rain Enklave Oecusse-Ambeno nia diak no legadu rasik, hamutuk ba moris diak ho orgulhu ba ita nia ukun rasik aan. Kontinua hamutuk halo tuir ezijensia no prudensia husi rezolusaun governu nu. 54/2025 loron 2 fulan Outubru,” dehan nia.
Autoridade RAEOA RDTL hakarak husu ema hotu atu haree, rekonhese no promove Oecusse-Ambeno uma boot, Ume Naek ma Sepe.
“Ita hotu nian no Republika Demoratika Timor Leste neebe dignu no onradu povu, rai no estadu RDTL ninian,”afirma Regio.
Antes nee, Xefe Suku Costa, Francisco Colo mos lamenta tebes ho autoridade Anterior neebe fo lisensa ba kompanhia internasional hodi ateiru lagoa masin area Oe upu nian, la iha koordensaun ho autoridade lokal Suku Costa nian neebe tau matan ba area urbana iha sidade Oecusse.
“Hau sente triste uitoan ho autoridade anterior sira neebe maka kontratu ba Investimentu iha area urbana suku Costa nian, la iha koordenasaun ho autoridade lokal, tanba nee ba oin husu ba autridade foun ho ninia estrutura diretor Regional sira, atu halo buat ruma, presiza koordena malu nunee obra neebe maka harii iha area urbana Oecusse, hetan mos kunhesimentu atu hamutuk responsabiliza ba futuru RDTL,” dehan nia.
Jornalista: Joseph Koa
Editor: Joseph Koa
