AMBENO, STLTIMORLESTE.com – Prezidente Autoridade Rejiaun Administrativa Espesial Oecusse-Ambeno (RAEOA), Regio da Cruz Salu, anunsiu ona ba publiku katak, tempu badak sei fo “surat cinta” ou karta ofisial ida hodi hapara asesor balun ho funsionariu termu-sertu neebe la nesesariu ona, atu termina sira nia kontratu too deit 31 Dezembru 2025.
Deklarasaun nee PA-RAEOA, Regio da Cruz Salu hatoo ba jornalista sira hafoin inauguura Kapela Oenunu, Suku Suni Ufe, Postu Administrativu Nitibe, Rejiaun Adminisratativa Espesial Oecusse-Ambeno (RAEOA), Tersa lokraik (09/12/2025) katak, Autoridade laiha intensaun atu estende tan funsionariu termu sertu sira iha Oecusse tanba laiha nesesariu serbisu, inklui Orsamentu Jeral Estadu (OJE) 2026 nian mos iha redusaun ba salariu no vensimentu.
“Komesa husi semana nee, presiza informa ba funsionariu termu sertu deznesesariu, la presiza atu kontinua tanba ita konsiente ho razaun prinsipal rua, primeiru, ita kontinua reorganiza, re-estrutura no reajustu prestasaun serbisu Autoridade nian, nunee kleur ka lais, 40% serbisu administrasaun publiku mak iha urbana restante ba iha terrenu, entaun funsionariu termu sertu sira, komesa semana ida nee, ita sei hasai surat cinta ou karta informativa ida ba sira katak, depois loron 31 Dezembru 2025, Autoridade laiha intensaun atu kontinua edtende kontratu,” dehan PA-RAEOA, Regio da Cruz Salu.
Nia salienta tan katak, funsionariu termu sertu neebe sei simu surat cinta ou karta informative, tanba haree ba serbisu la nesesariu, serbisu estrutural Autoridade RAEOA bele halo, razaun nee atu reajusta nivel salariu tabela funsaun publika nian.
Razaun segundu, presiza konsiente katak iha tinan 2026, OJE iha redusaun ba salariu no vensimentu, laos dezafiu maibe nuudar teste ida ba Autoridade RAEOA, ho rekursu naton maibe bele produs rezultadu neebe iha progresu diak.
“Ida nee prosesu normal, iha serbisu administrasaun ba jestaun rekursu umanu, iha tempu ida tenke redus, tempu ida tenke reajusta no tempu ida tenke rekoloka, maibe orsamentu barak liu tenke tuun ba setor nesesariu sira ba povu, nunee mos ita foku ba zona ekonomika espesial ba Dezenvolvimentu Oecusse-Ambeno (ZEEDOA), ida nee mak ita nia kompromisu,” afirma PA-RAEOA.
Responde perguntas jornalista kona ba numeru funsionariu iha Oecusse hamutuk hira, nia dehan kona ba total numeru funsionariu termu sertu sira iha Oecusse lahatene hira.
“Numeru hau labele fo sai, maibe ita sei haree karta, hira mak sei fo sai ba termu sertu sira, serteza sei hahu husi Gabinete Prezidente Autoridade, tenke reajusta inklui diresaun sira hotu iha Oecusse,” afirma PA-RAEOA.
OGE tinan 2026 neebe hetan aprovasaun iha uma fukun Parlamentu nasional (PN) ba RAEOA hamutuk milhoens US$ 60.
Jornalista: Joseph Koa
Editor: Joseph Koa
