DILI, STLTIMORLESTE.com – Prezidente Autoridade (PA) Rejiaun Administrativa Espesial Oekusi-Ambeno (RAEOA), Rogeiro Lobato sei esforsu makaas hodi redus numeru labarik neebe faan iha dalan ninin.
Tuir Ekipa konjunta husi Institutu Defeza ba Direitu Labarik (INDDICA) ho Ministeriu Solidariedade Sosial no Inkluzaun (MSSI) hamutuk ho eskuadra eskuadra Polísia Nasional Timor Leste Don Alexo identifika labarik neebe mak faan sasan iha estrada ninin maioria husi Oekusi oan, oinsa PA nia haree ba ida nee, hatan ba kestaun nee PA RAEOA hatete sei esforsu makaas hamutuk ho ekipa sira nee hodi redus numeru labarik faan iha dalan ninin.
“Nee laos husi administrasaun ida nee deit, maibe husi besik tinan 10 sira nee mai iha nee, agora ita halo saida para trava situasaun ida nee, nunee labele iha explorasaun infantil ba labarik sira neebe mak halao servisu,” katak PA RAEOA ba jornalista sira iha Tribunal Primeiru Instansia Dili, Segunda (30/06/2025).
Aleinde nee nuudar Prezidente Autoridade RAEOA sa politika mak halo hodi bele redus numeru explorasaun infantil ou labarik sira faan iha dalan ninin nee? hatan ba kestaun nee PA dehan sei halo esforsu nafatin hodi solusiona problema nee.
“Nuudar Prezidente Autoridade halo esforsu nafatin para hatun numeru maibe nee laos mai husi hau deit, maibe husi situasaun nee simu husi administrasaun seluk, maibe ba oin ita sei halo esforsu para diminui, laos diminui deit maibe atu kombate, tanba labarik sira nee dala ruma ema balun mak tama iha klaran halo trafika umanu halo buat sira nee hotu para haruka labarik sira mai, no halo explorasaun ba infantil,” katak nia.
Nunee mos tuir dadus katak labarik sira nee maioria husi Oekusi, tuir PA RAEOA nee los ka lae? Hatan ba kestaun nee Rogeiro dehan nia la hatene maibe nee jornalista mak dehan.
“Hau hatene katak balun mai husi Oekusi, maibe husi Oekusi deit ka husi mos fatin seluk, tanba ema halo explorasaun ba infantil nee eziste,” katak nia.
Nia hatete, nuudar Prezidente Autoridade RAEOA prontu kolabora ho INDDICA ho ekipa atu kombate explorasaun infantil.
Ekipa konjunta husi INDDICA ho MSSI hamutuk ho eskuadra PNTL Don Alexo identifika labarik neebe mak faan sasan iha estrada ninin maioria husi Oekusi oan.
Xefe Monitorizasaun INDDICA, Isaias Pereira hatete, iha tinan 2025 INDDICA koordena ho ekipa Oekusi atu halo ajustamentu ba labarik sira husi Oekusi neebe barak hela iha Dili.
“Dadus fo hatene katak labarik 39 husi Oekusi mak identifika iha Estrada ninin maibe ita seidauk identifika munisipiu seluk,” dehan nia.
(eme)
