DILI, STLTIMORLESTE.com – Padre Abel Soares Alves husu ba Governu atu ezekuta Orsamentu Jeral Estadu (OJE) 2025 neebe ho montante bilhaun US$ 2.6 nee ho diak, atu nunee povu labele halerik tan ba estrada, eletrisidade, bee moos no seluk tan.
Bibi Atan Kerda Katolika nee dehan, OJE 2025 nee boot, nunee rai kiik populasaun mos oituan, maibe la uza osan nee ho didiak entaun osan boot naran deit la haree mudansa ida, realidade la hatudu took osan boot nee ninia valor ba dezenvolvimentu nian.
“Tanba nee tinan 2025 komitmentu governu nian hein katak bele hadia buat hotu husi orsamentu neebe boot ida nee, bele responde duni nesesidade povu sira nian hanesan estrada, ponte, eletrisidade no bee, tanba sai nesesidade baziku ba ita nian povu ida nee,” hatete Padre Abel ba STL husi telefone iha Lacluta (15/11/2024).
Padre nee hatutan, importante mak estrada, ponte, bee, eletrisidade tenke prienxe, lae tinan 20 resin ukun aan, maibe povu halerik nafatin, ahi la too nafatin ba povu sira hotu, estrada ema halerik hela liu-liu iha foho kuandu udan tau labele halo movimentu, no bee moos sei ba kuru iha mota, nunee koalia dehan bee moos, maibe nunka too ba povu sira nia leet.
Kuandu nesesidade povu nian fasilita ona, povu mos badinas tebes atu halo fila liman diak lori produtu ba iha merkadu, hodi hetan benefisiu ba sira nia moris rasik.
Tanba nee tenke aselera para povu iha area rurais mos goza, keta fatin balu deit mak goza ba estarda, bee, ahi no ponte, maibe foho oan terus kontinua deit tinan ba tinan.
“Hein katak sira neee iha kompetensia ezekuta OJE 2025 nian, iha lina ministerial sira oinsa bele jere osan povu nian halo didiak, tanba iha edukasaun hakilar nafatin, agrikultura, saude, sosial hakilar nafatin, ita nia povu la sente ukun aan ida nee ninia valor iha neeba, tanba nee sira neebe iha kompetensia tenke jere osan ho didiak ba buka ho laran neon tomak ezekuta ho domin ba povu TL,” hatete Pe. Abel.
(joa)
