DILI, STLTIMORLESTE.com – Padre Domingos Maubere sei baixa iha Intensive Care Unit (ICU) Hospital Nasionál Guido Valadares (HNGV) halo tratamentu saude.
Nia dehan, Amu Domingos Maubere halo ona tratamentu iha ospital Malazia no fila-fila baixa iha dia 8 Maiu nee no agora kontinua baixa iha sala ICU HNGV.
“Fou-foun nia mai baixa iha sala VIP dia 11 too agora nee nia muda mai ICU, tanba nia kondisaun trop, no ita haree Amu nia kondisaun nee kondisaun krítiku, ami klafikasaun nia kondisaun krítiku, tanba iha fase nia moras nee iha faze ida terminal, nee ita bele dehan ba tratamentu koletivu deit, atu tratamentu rekopera total nee laiha ona,” hatete Diretór Servisu Apoiu Diagnóstiku no Terapeutiku HNGV, Vidal de Jesus Lopes ba jornalista sira iha nia knaar fatin HNGV, Tersa (13/05/2025).
Nia esplika, Padre Domingos Maubere kondisaun grave no agora uza fintilator no baixa iha ICU. Bazeia ba Padre Domingos Maubere nia moras rasik no tratamentu neebe mak halao ona.
“Ita labele asegura dehan 100% nee tenke fila-fali ba normal, tanba ba kategoria ida nia moras nee tama ona terminal, nia moras nee rasik signifika tratamentu koletivu deit, ida nee mak ita bele halo, ita halo deit ida nee, mais tratamentu atu fila-fali ba normal nee laiha ona,” nia esplika.
Iha fatin hanesan, Juventude Julicia do Carmo informa, Padre Domingos Maubere sei kontinua baixa iha ICU hodi halao tratamentu saude, maibe ema komesa posting iha pájina Facebook katak Padre Domingos Maubere laiha ona.
“Ita nuudar sarani katolika tenke reza ba Aman Maromak hodi salva Padre Domingos Maubere nia vida, Amu seidauk mate ema dehan mate ona, labele hanesan nee, nee ita hotar ona Amu, hau sente triste wanhira ema tau iha media sosial hanesan nee,” nia deklara.
Antes nee iha loron 11 Maiu 2025, Primeiru Ministru Kay Rala Xanana Gusmão mos halao ona vizita ida ba Padre Domingos Maubere iha ICU-HNGV maibe kondisaun saude krítiku.
Fo hanoin fali katak Padre Domingos Maubere halao ona tratamentu ba nia saúde dala barak iha rai liur, maibe doutor sira foti liman no too agora seidauk rekupera no sei kontinua halo tratamentu iha ICU HNGV.
(jen)
