BAUKAU, STLTIMORLESTE.com – Padre Juvinal Gusmão hetan baku ka agresaun fiziku husi grupu balu iha Igreja Parokia Santa Terezinha Kelikai, Munisipiu Baukau.
Familia Estevão Gusmão konta, insidente nee akontese iha loron 12 Outubru 2025, madrugada, bainhira Padre nee fila husi uma familia iha Aldeia Ossolia, Suku Letemumo, Postu Kelikai, ba ho motor mio beat atu ba Kelikai Vila, maibe too iha Aldeia Mukububo, Suku Lacoliu, Postu Kelikai, hetan asaltu husi grupu balu.
“Padre nee ordena tiha nia halimar deit iha nee loron 12 nee mak atu ba Lautem, entaun jam 05 madrugada nia sai husi Ossolia mesak atu mai troka iha Kelikai depois mak ami tuir lao hamutuk ba Lautem la kleur telefone ema baku nia iha dalan parte Lakuliu nian,” Estevão hateten iha Kelikai, Kuarta (15/10/2025).
Padre Juvinal Gusmão hetan ordenasaun husi Bispu Diozese Baukau, Dom Leandro Maria Alves iha loron 01 Outubru 2025 iha Igreja Santa Terezinha Kelikai no loron 12 Outubru 2025 atu desloka ba Munisipiu Lautem, tanba hetan pose husi Bispu Diozese Baukau ba kargu Vigario Jeral iha Igreja Parokia Kristu Rei Liurai Lautem, maibe hetan asaltu iha Suku Lacoliu Kelikai.
Mezmu Padre Juvinal Gusmão hetan asaltu iha Suku Lacoliu Kelikai, maibe obrigasaun nuudar Vigario Jeral iha Igreja Parokia Kristu Rei Liurai Lautem, Padre Juvinal Gusmão ba duni Munisipiu Lautem hodi halao knaar Igreja Katolika nian.
“Baku tiha Amu Padre mos informa kedas ba Polisia ami ba duni Lautem, tanba iha neeba nee mos preparadu ona,” Estevão konta.
Familia nee haktuir, informasaun neebe Padre Juvinal Gusmão konta ba familia sira relasiona ema asaltu katak, autor sira la hodi kroat, maibe tebe deit Padre nia kotuk laran no la rezulta Padre monu husi motor leten, maibe hetan bubu iha parte kabas loos.
“Tebe deit Padre maibe la monu, sira tebe nee mak Padre nee dehan hau Amu nusa mak imi tebe fali hau nee mak foin ema nee halai,” Estevão esplika.
Parte familia nee husu parte seguransa buka tuir autor ba kazu nee no submete ba prosesu investigasaun, tanba hahalok refere estraga imajen Parokia Santa Terezinha Kelikai no igreja Katolika iha Timor-Leste.
Too notisia nee publika jornalista STL la hetan komentariu husi Padre Juvinal Gusmão, tanba daudaun halao hela servisu iha Igreja Parokia Kristu Rei Liurai Lautem, maibe informasaun neebe STL asesu Komando Polisia Munisipiu Baukau liu husi Eskuadra Postu Kelikai bolu ona suspeitu nain 6 ba kazu nee.
Jornalista: Tomas Reis
Editora: Carme Ximenes
