DILI, STLTIMORLESTE.com – Padre Manuel de Aroujo Nunes da Silva husu Familia neebe hasoru problema labele lakon esperansa ba Jesus, tanba Jesus mak salvasaun ba moris rohan laek.
Padre Manuel de Aroujo Nunes da Silva hatoo kestaun nee ba jornalista STL iha Kakaulidu, Dili, Tersa (01/10/2025).
Padre dehan, moris iha mundu sempre hasoru problema oin oin iha familia idak idak, maibe keta lakon esperansa hodi hatoo silensiu ho Maromak, tanba ho silensiu neebe hatoo ho fuan laran sei hetan esperansa husi Jesus.
Bainhira hasoru problema iha familia, iha serbisu fatin ka iha sosiedade lalika konta ba ema seluk, diak liu ho silensiu ba koalia ho Jesus buat neebe hasoru, tanba bainhira koalia ho matan been, ho fuan laran fiar ba katak sei hetan hetan esperansa, tanba esperansa la bosok.
“Familia sira neebe dala ruma hasoru Problema hodi lakon esperansa, ita hatene katak tinan ida nee tinan esperansa, esperansa labosok, ita mos hatene katak nain feto neebe ita fiar, nia mos hasoru problema iha uma laran maibe nia rai nonok deit, ita hanoin tok bainhira Jesus atu mate no saun Jose atu husik nia, maibe nia nonok husik deit ba hasae ba Maromak iha nia orasaun sira, hau fiar katak sarani sira neebe problema atu fulan nain Feto Rosariu nia bele reza hodi hetan inspirasaun ruma husi nain feto, atu nunee bele rezilve problema sira neebe sira hasoru,” dehan Padre Manuel.
Nia afirma,bianhira hasoru problema keta haluha hakbesik aan ba Maromak hatoo buat hotu silensiu ho tanis ba Maromak nia futar oin.“Tebes iha evangelhu Jesus sublina katak atu tama iha reinu lalehan, ita presiza aprende sai hanesan labarik kiik sira haraik aan inosente nakonu ho komfiansa iha Maromak,” dehan nia.
Padre Selebrante nee hatutan, Jesus mos hanorin katak bainhira atu tama iha Lalehan presiza halo aan labarik, hanesan labarik kiik sira ho neon ho laran senseridade kurasaun hatete ba Jesus frakeza hotu, no problema sira, no susar, terus, tanba ema neebe haraik aan iha Maromak nia futar oin hafoin nia hetan sabedoria esperitual atu nain haraik ba nia grasa neebe nia presiza.
Nunee mos ohin Igreza no sarani selebra loron mahein Santa terezinha do menino Jesus, Santa nee hakarak hamutuk ho Jesus, nia hakarak boot atu hamutuk ho Jesus tanba nee naran Santa Terezinha do Menino Jesus tanba nia hakarak habesik aan ba Jesus iha festa Natal, no nia nunka baruka hakarak halo buat diak ho buat neebe Maromak hakarak husi nia.
Jornalista: Emerenciana Pinto
Editora: Carme Ximenes
