DILI, STLTIMORLESTE.com – Padre Manuel da Silva Ximenes, SDB husu sarani husi Aldeia Waimanuboe no Watubala (Waiwatu) atu kuda virtude haraik aan nafatin hodi kria dame iha aldeia laran, tanba tuir kultura mesak familia deit.
Padre Manuel da Silva Ximenes SDB hatoo kestaun nee ba STL, bainhira remata inaugural kapela Liasidi, Sabadu (08/11/2025) husu sarani husi aldeia rua neebe babain bolu hamutuk Waiwatu, presiza kria unidade no dame iha bairru laran, tanba tuir kultuira sarani no povu aldeia rua laos ema seluk maibe mesak familia deit.
Padre hatutan, Waiwatu oan laiha ema ida mak haketak tanba mesak familia fetosan humane deit laiha ema seluk iha laran, no ema labele haketak ema idak idak presoza ho virtude haraik ba malu perdua malu.
“Hau nia mensajen ba Waiwatu sira katak waiwatu nee ida deit, ida deit nee katak laiha ema ida haketak, kuandu labele haketak nee katak imi tenke hamutuk ho virtude ida haraik aan ba malu pasensia ba malu, perdua malu, rona malu, respeita malu, kuandu virtude sira nee laiha Waiwatu nee diak liu halo rahun tiha, maibe hakarak waiwatu nee kontinua hamutuk tenke kuda virtude sira nee iha povu ida idak nia moris no sarani idak idak nia moris,” dehan Padre Manuel.
Iha biban nee, Padre husu sarani no povu neebe mak partense iha aldeia rua Waimanuboe no Watubala neebe naran tau hamutuk ona desde uluk Waiwatu nee, presiza kria pas iha idak idak nia fatin tanba sarani no povu husi aldeia rua laos ema seluk ema leet, maibe mesak familia fetonsan humane laiha ema seluk.
Bainhira iha liafuan ruma naksalak ba malu bolu malu tuur hamutuk hodi koalia ho ulun malirin labele uza violensia hodi rezolve problema, ”Problema ruma iha karik tuur hamutuk halo desizaun ho ulun malirin laos ho violensia,” hatete Padre Manuel.
Nunee mos Xefe Aldeia Waimanuboe, Benvindo Xavier Gusmao hatutan, bazeia ba padre nia mensajen neebe hatete katak se komunidade, Joventude, entidade oin oin neebe iha Waiwatu kuandu lahamutuk diak liu lalika tau naran Waiwatu, tuir Xefe Aldeia nia hanoin katak, idea Padre nia nee los.
Xefe Aldeia ho matawen hatete, liafuan Padre hatete nee loos, tanba sarani no povu Aldeia rua Waimanuboe no Watubala mesak familia deit, maibe dala ruma mos mosu dezentedimentu iha aldeia laran.
“Kuandu Waiwatu oan ka komunidade no juventude no entidade oin-oin neebe iha Waiwatu nee la hamutuk lalika tau naran ida Waiwatu nee los, nee los tanba durante nee ami aldeia (Waiwatu) Waimanuboe Watubala iha dezentendimentu neebe barak, konflitu oin-oin, mezmu iha ami nia knua rasik haketak malu, harii uma kain ba beibeik, ami komunidade aumenta ba beibeik, tanba nee mak ho interpretasaun husi Amu Manuel nuudar Waiwatu oan koalia hanesan nee klaru no los, maibe agora ba oin ami autoridade lokal sei tenta sei tenta ho maneira oin oin bele hafanu joventude hamutuk liu liu kria pas, Fraternidade entre umana,” dehan Xefe Aldeia nee.
Autoridade lokal nee dehan, bainhira Waiwatu oan moris iha Pas no Fraternidade ida nee fila fali ba ema idak idak nia konsiensia rasik, se laiha konsiensia no koalia buat ruma laho fuan laran mak bolu naran deit mak hamutuk Waiwatu maibe ema labele hamutuk.
“Se laiha konsiensia mak ho naran deit mak Waiwatu maibe ba oin juventude Waiwatu no komunidade Waiwatu sei la hamutuk nafatin, tanba saida mak hau nuudar autoridade koalia hanesan nee tanba ho ami nia Ego, juventude idak-idak nia ego kada uma kain tradisaun neebe pertense ba aldeia rua nia ego mak sobu unidade fraternidade entre Waiwatu,” dehan nia.
Nia hatutan, ema idak-idak presiza iha konsiensia hodi kria pas no fraternidade hodi hametin Naran Waiwatu tanba povu husi Aldeia rua ema ida deit fetosan no umane, tanba nee husu komunidade idak idak ho maneira konsiensia bele transforma mentalidade ba unidade Fraternidade umana entre Waimanuboe no Watubala.
Jornalista: Emerenciana Pinto
Editora: Carme Ximenes
