DILI, STLTIMORLESTE.com – Xefe Suku Lavateri, Domigos da Costa Pereira hatete, Ministeriu Solidariedade Sosial no Inkluzaun (MSSI) liu husi Institutu Nasional Seguransa Sosial (INSS) ho Banku Nasional Komersiu Timor Leste (BNCTL) sei halo pagamemtu ba idozus no Ema ho Defisiensia (EhD) iha Suku Lavateri, Postu Admnistrativu Baguia, Munisipiu Baukau, hahu iha loron 1 Julhu tinan nee.
Xefe Suku Lavateri, Domingos da Costa Pereira esplika, BNCTL fo sai ona orariu pagamentu ba faze daruak ba idozu no EhD, nunee Suku Lavateri sei halo pagamentu hahu iha loron 1 fulan Julhu tinan nee
“Iha 1 Julhu tinan nee benifiasiariu sira simu nia direitu ona, data nee fiksu tiha ona, tanba ami simu ona karta husi BNCTL no MSSI katak komesa halo ona pagamentu ba benifisiariu sira,” dehan Xefe Suku Lavateri, Domingos Pereira ba jornalista STL liu husi telefone, Sesta (27/06/2026).
Domingos tenik, daudaun nee benefisiariu sira simu osan direitamente, ba sira neebe mak iha konta bankaria bele ba foti iha banku mos diak, maibe ba idozu sira neebe mak idade los ona, lao labele ka balun moras hakarak ka lakohi BNCTL lori osan nee ba too iha uma hodi halo pagamentu ba sira.
“Ba benifisiaria sira neebe mak katuas los ona, lao labele, balun moras, Xefe Suku inklui Xefe Aldeia sira halo hela karta ida haruka ba sosial, depois mak sosial orienta fali BNCTL mai fahe osan no sira lao too iha uma, ba sira neebe mak kondisaun diak hela sira mai rasik iha sentru suku hodi hetan sira nia direitu,” nia sublina.
Domingos sublina, ba benifisiariu hirak neebe mak ferik katuas ona, BNCTL bele ba halo pagamentu too iha uma, maibe ho ninia distansia nee labele liu 5 kilometru, tanba sira lori osan neebe mak ho montante boot, se fora husi 5 kilometru nee ninia prosesu nee oin seluk fali, no kontinua halo karta ba MSSI depois mak halo pagamentu ba sira.
Domingos fundamenta, benefisiariu sira neebe mak atu simu sira nia direitu iha loron 1 fulan Julhu tinan nee hamutuk 214 pesoas inklui mos EhD.
Nunee too tempu atu halo halo pagamentu ba idozu sira, Xefe Suku sei fo hatene ba kada Xefe Aldeia sira tun direita ba baze hodi fo hatene ba komunidade sira mai hamutuk iha sentru suku hodi simu sira nia direitu.
“Ami fo hatene hela ba kada Xefe Aldeia sira depois mak sira tun ba baze hodi fo hatene ba benifisiariu tomak hodi mai iha suku simu sira nia direitu,” nia salienta.
Entretantu iha Suku Lavateri total populasaun hamutuk 2.480, kompsotu husu aldeia lima mak hanesan Aldeia Ledana, Aldeia Osso isilari, Aldeia Honortibalari, Aldeia Fanalolo no Aldeia Uabubu.
(EST 1)
