DILI, STLTIMORLESTE.com – Xefi Suku Vessoro, Paulo Fernandes hatete, Ministeriu Solidariedade Sosial no Inkluzaun (MSSI) liu husi Institutu Nasional Seguransa Sosial ho Banku Nasional Komersiu Timor Leste (BNCTL – siglaportuguês) sei halo pagamentu ba idozus no Ema ho Difisiensia (EhD) iha Suku Vessoro, Postu Administrativu Watulari, Munisipiu Vikeke sei halao iha fulan Julhu.
Xefi Suku Vessoro, Paulo Fernandes hatete, kona-ba pagamentu idozus Ema ho Defisiensia (EhD) ba iha segundu faze, orariu husi BNCTL fo sai ona, tanba nee sira sei simu osan tuir orariu iha loron 14 Julhu tinan nee.
“Ami nia benefisiariu nain 100 resin sei halo pagamentu neebe realiza iha fulan Julhu tinan nee,” hatete Xefi Vessoro, Paulo Fernandes ba STL liu husi telefone iha Vikeke, Sabdu nee (21/06/2025).
Tanba nee benefisariu sira hein, too tempu halo pagamentu Xefi Suku ho Xefi Aldeia sei avizu ba komunidade sira para mai iha suku hodi simu sira nia direitu.
Nia dehan, pagamentu ba benefisariu iha sistema rua, balun mai direita iha suku simu osan no balun neebe loke konta bankaria sira osan sei transfere ba sira neebe uza ATM kada fulan tolu foti dala ida.
Nuudar Autoridade lokal sente kontente governu liu husi Ministriu Solidariedade Sosial no Inkluzaun (MSSI) bele ajuda idozus nomos EhD atu sustenta ba nesesidade loron-loron nian.
Total populasaun Suku Vessoro hamutuk 2.100 no kompostu husi Aldeia 7 mak hanesan Balabasida, Mau Boru, Culu Dere, Bahao, Uani Uma, Baha Buga no Matau.
(joa)
