DILI, STLTIMORLESTE.com – Palasiu Prezidensial odamatan nakloke ba publiku, nuudar espresaun konkreta ida kona-ba kompromisu transparansia.
Kestaun nee hatoo husi Prezidente Republika, Jose Ramos Horta liu husi nia diskursu iha abertura solene sesaun da III Legislativa ba dala VI, iha Parlamentu Nasional Nasional, Segunda (15/09/2025).
Prezidente Republika hatete, Programa “Palasiu Abertu Prezidensia Republika” durante nee implementa Programa Palasiu Abertu nuudar espresaun konkreta ida kona-ba ninia kompromisu ba transparensia, prosimidade, inkluzaun no pratika governasaun diak.
“Ami loke odamatan Palasiu Prezidensial nian ba publiku, ho vizita guiada sira neebe, entre deit fulan Abril no Agostu tinan ida nee, simu ona ema liu 632, inklui estudante nasional sira, grupu komunitariu sira no delegasaun estranjeira sira, ho objetivu atu divulga ita-nia rain no Prezidensia Republika nia istoria,” dehan PR Horta.
Prezidente Republika hatutan, iha tempu hanesan, hadia jardín sira ho apoiu hosi nasaun belun sira, neebe kulmina iha inaugurasaun hosi Mini Zoolojiku neebe destinadu atu eduka populasaun kona-ba importansia no dever atu konserva diversidade biolojika, hodi alerta ba nesesidade urjente atu proteje espesie sira neebe iha risku ba estinsaun.
Entre espesie sira nee, destaka Civeta (Meda Idu Lako), neebe desempena papel uniku iha prosesu produsaun kafe Lako nian, rekonesidu internasionalmente hanesan ida neebe prestijiadu no folin-boot liu iha mundu, hodi simboliza ligasaun metin entre konservasaun ambiental no valorizasaun patrimoniu natural no kultural Timor-Leste nian.
Xefe Estadu hatete, vizita sira ho guia ba Palasiu komplementa ona ho vizita sira ba Galeria Memoria Moris, espasu ida neebe hanorin valor no prinsípiu sira sidadania nian, prezerva memoria luta libertasaun nasional nian no komemora momentu boot sira restaurasaun independensia nasional nian.
Polítika abertura ida nee abranje mos Palasiu Nobre Lahane, neebe integra daudaun ona iha Programa Palasiu Abertu, hodi transforma ba espasu privilejiadu ba atividade kultural, edukasional no eventu sira ho nivel aas. Dinamika ida-nee hosi Prezidensia ida neebe akolledora neebe besik ba nia sidadaun sira reforsa liutan ho konstrusaun piscina komunitaria labarik nian no mini zoologiku, integradu ho vizita sira ho orientasaun ba instalasaun prezidensial nian.
Aleinde nee programa komunikasaun Dijitalizasaun konseitu Palasiu Abertu nee laos deit ba espasu fíziku sira Prezidensia Republika nian, maibe habelar mos ba espasu dijital, liu hosi Prezidensia Republika nia prezensa ativa iha rede sosial sira no nia pajina ofisial iha Internet.
Website ida-nee atualiza beibeik ho notísia sira, komunikadu imprensa, dokumentu ofisial, fotografia no vídeo sira neebe dokumenta atividade prezidensial sira tuir prioridade estratejika sira neebe fo sai ona. Servisu Komunikasaun Sosial hosi Prezidensia, hamutuk ho mídia nasional sira seluk, halao ona knaar sentral hodi liga Prezidensia Republika ho sidadaun sira, ho objetivu atu promove partisipasaun sívika neebe boot liu no konxiensia informada ida kona-ba knaar Prezidente Republika nian.
Destaka mos transmisaun sira iha Radiu no Televizaun Timor-Leste (RTTL), inklui Programa Prezidente Horta Show nian, Programa Palestra Prezidensial sira no kobertura serimonia solene sira seluk, hanesan vizita Sua Santidade Papa Francisco.
Iha espíritu inovasaun no abertura hanesan ida-nee, Prezidensia mos promove ona esforsu konsistente ida atu dijitaliza servisu sira, dokumentu sira no pratika administrativa sira, tuir kauza nasional boot “Governu Eletroniku nian
Ida nee hanesan modernizasaun estratejika ida neebe hetan ona apoiu hosi Institutu Tony Blair (TBI) no parseiru internasional sira seluk, neebe nia kontribuisaun sai importante hodi moderniza administrasaun prezidensial, hodi halo nia sai agil liu, efisiente liu no adapta ba ezijensia sira sekulu XXI nian.
Jornalista: Emerenciana Pinto
Editor: Xisto Mendonca
