BAUKAU, STLTIMORLESTE.com – Prezidente Autoridade Munisipiu (PAM) Baukau, Veneranda Lemos husu komunidade sira iha Munisipiu Baukau atu pasiensia hein projetu reabilitasaun estrada urbana Baukau Vila.
“Estrada urbanas nee kompetensia nasional, orsida hau dehan fulan ida nee fulan oin mak la akontese hau sala, neebe diak liu komunidade hein ho pasiensia,” Veneranda Lemos hateten ba STL iha edifisiu Servisu Administrasaun Autoridade Munisipal Baukau, Segunda (26/01/2026).
Autoridade Munisipal Baukau nee katak, prosesu ba implementasaun projetu estrada urbana iha Baukau Vila nia parte la fo ona komentariu, tanba antes nee informa uluk projetu refere atu lansa fatuk dahuluk iha fulan Maiu 2026, maibe la akontese no informa tan atu lansa iha fulan Novembru 2025 maibe la akontese, nunee konsidera estrada urbana nuudar projetu nasional neebe kompetensia tomak iha nasional, tanba nee husu komunidade hotu pasiensia hein prosesu sira.
Maibe iha loron 26 Janeiru 2026, ofisialmente Primeiru Ministru Kay Rala Xanana Gusmão hamutuk Autoridade Sivil no Militar lansa ona fatun dahuluk ba projetu reabilitasaun estrada Ermera no posibilidade projetu estrada urbana Baukau Vila mos sei akontese.
“Ohin loron ida nee halo ona lansamentu estradas urbanas ba Ermera, entaun Baukau nian talvez depois de Ermera, se Prezidente Autoridade mak iha kompetisaun deside halo estrada nee karik ita halo tiha ona, maibe ida nee estrada nasional neebe kompetensia iha Obras Publikas, ita hein hau mos hein,” Veneranda argumenta.
Prezidente Autoridade Munisipal nee rekoinhese, kondisaun estrada urnaba iha Baukau Vila husi Vila Antiga too rotunda Vila Nova no husi rotunda Vila Nova too area Uainiki Nagardjo daudaun nee kondisaun aat no grave iha neebe difikulta movimentasaun transporte publiku no privadu, maibe Autoridade Munisipal laiha kompetensia atu deside hodi hadia estrada refere, tanba estrada refere kategoria estrada Nasional, nunee husu komunidade sira pasiensia hein prosesu sira husi Nasional.
Entretantu implementasaun projetu estrada urbana Baukau Vila neebe antes nee Autoridade relevante sira iha Munisipiu Baukau relata hamutuk kilometru 23, neebe kobre husi Vila Antiga too Vila Nova no kontinua too area Uainiki Nagardjo, nunee mos husu husi Vila Antiga too Uainiki Nagardjo ligasaun ho estrada diresaun Baukau-Dili.
(tom)
