BAUKAU, STLTIMORLESTE.com – Autoridade Munisipiu Baukau sei koordena ho Ministeriu Saude (MS), hodi haree kondisaun kareta multi funsaun ambulansia sira.iha Servisu Saude Munisipal.
Prezidente Autoridade Munisipiu Baukau, Veneranda Lemos hatete, relasiona kazu deskonfia bebe ida mate iha inan nia kabun laran, neebe akontese iha Suku Samalari, Postu Administrativu Baguia katak falha husi kareta multi funsaun ambulansia neebe destaka iha Sentru Saude Baguia, Autoridade Munisipiu simu ona informasaun husi parte familia, nunee sei relata ba Ministeiru Saude.
“Se karik mak ami halo ezersisiu iha 2026 ami sei husu ba Ministeriu Saude tau mos atensaun ba kareta sira neebe kondisaun ladun diak ona, tanba kareta sira nee kuandu kondisaun la diak ita enfrenta difikuldade,” hatete Veneranda ba jornalista sira iha Vila Nova, Baukau, Kinta nee (20/03/2025).
Nia akresenta, bainhira kareta multi funsaun ambulansia neebe destaka iha fasilidade saude mak kondisaun aat sei fo impaktu ba pasiente nia saude, tanba pasiente presiza atu transfere lalais ba fasilidade saude neebe ekipamentus ba atendimentu sufisiente, maibe kondisaun kareta multi funsaun ambulansia aat, bele enfrenta difikuldade iha baze.
Nunee relasiona kazu akontese iha Baguai sai preokupasaun ba Autoridade Munisipiu, tanba nee sei bolu atensaun ba Diretor Servisu Saude Munisipal hodi identika kondisaun kareta multi funsaun ambulansia sira iha Baukau hodi relata ba Ministeiru Saude ba kareta neebe atu halo manutensaun bele halo manutensaun ho diak liu tan.
Maibe Prezidente Autoridade Munisipiu Baukau nee dehan, kona-ba kazu Baguai informasaun seluk iha pesoal saude atu ajuda pasiente inan gravida tula husi Suku Samalari ba Sentru Saude Baguia hodi hetan asistensia partu, maibe pasiente rasik lakohi atu partu iha Sentru Saude no hakarak partu iha uma.
“Infelizmente ita tenke hetan vitima hanesan nee, ita triste lakon ita nia ema, maibe ba futuru favor ida tenke iha kooperasaun, se lae iha vitima mak fo sala deit ba Instituisaun Governu nian,” Veneranda akresenta
Autoridade Baukau nee husu komunidade hotu prezisa hametin kooperasaun no fiar ba rekursu umanus ho fasilidade ba atendimentu neebe estabelese ona iha nivel fasilidade saude sira, maibe bainhira la koopera no ikus hetan kondisaun seluk labele fo sala ba Instituisaun Estadu.
Tanba rekursu neebe Estadu liu husi kada Governasaun investe objetivu atu fo tulun ba komunidade neebe presiza tratamentu.
Entretantu kazu deskonfia bebe ida mate iha inan nia kabun laran, tanba falha husi kareta multi funsaun ambulansia destaka iha Sentru Saude Baguia, akontese iha loron 16 Marsu tinan nee.
(tom)
