DILI, STLTIMORLESTE.com – Iha loron 21 Abril 2025, iha oras 9:45 dader (oras lokal Roma, Italia), Kardinal Kevin Farrell, Camerlengo husi Câmara Apostólika, anunsia husi Casa Santa Marta ho liafuan sira nee: “Irmãus no irmãs karidus, ho tristeza boot hau tenke anunsia mate husi ita-nia Aman Santu Francisco. Iha dader nee oras 7:35, Bispu Roma, Francisco, fila ba uma Aman Nian. Nia moris tomak dedika ba servisu ba Maromak no ba nia Igreja. Nia hanorin ita atu moris ho valor sira husi Evangelhu ho lealdade, korajen, no amor universal, liu-liu ba ema kiik no marginalizadu. Ho gratidaun boot ba nia ezemplu hanesan disipulu verdadiro ba Jesus, ita entrega alma Papa Francisco ba amor misericordioso husi Maromak Ida no Trinu.”
Papa Francisco tama iha Ospital Poliklinika Agostino Gemelli iha Sesta-Feira, 14 Fevereiru 2025, depois sofre bronchitis durante loron barak. Nia kondisaun klinika aat gradualmente, no mediku sira diagnostika pneumonia bilateral iha Tersa-Feira, 18 Fevereiru. Depois de loron 38 iha ospital, Papa Francisco fila ba nia rezidensia iha Vatikanu, Casa Santa Marta, atu kontinua rekuperasaun.
Iha tinan 1957, tempu Jorge Mario Bergoglio (Papa Francisco) ho idade 20, nia halo sirurgia iha Argentina atu hasai parte ida husi nia pulmaun neebe afeta husi infesaun respiratoria grave. Bainhira nia idade aumenta, Papa Francisco frekuentemente sofre moras respiratoria, inklui kansela viajen planeadu ba Emirados Arabes Unidos iha Novembru 2023 tanba influenza no inflamasaun pulmaun.
Iha Abríl 2024, Papa Francisco aprova edisaun atualizada husi livru liturgiku ba ritus funeral Papa, neebe sei orienta Misa Funeral neebe too agora seidauk anunsia. Edisaun foun husi Ordo Exsequiarum Romani Pontificis introdus elementu foun sira, inklui oinsa atu maneja restu mortal Papa depois de mate. Konstatasaun mate halao iha kapela, laos iha kuartu neebe nia mate, no nia korpu imediatamente tau iha kaixaun.
Arcebispu Diego Ravelli, Mestre de Serimonias Apostolika, hateten katak Papa Francisco husu atu ritus funeral simplifikadu no fokus ba espresaun fé Igreja nian iha Korpu Ressuscitadu Kristu nian. “Ritu renovadu,” Arcebispu Ravelli dehan, “buka atu enfatiza liutan katak funeral Pontifise Romanu nee hanesan pastor no disipulu Kristu nian, laos ema poderoso husi mundu nee.”
(Ekipa STL)
