VATIKAN, STLTIMORLESTE.com – Papa Francisco, lider Igreja Katoliku iha mundu, agora daudaun baixa hela iha Hospital Gemelli, Roma, desde Sesta (14/02/2025). Vatikan informa, Papa Francisco neebe agora nee idade 88 ona hetan moras Pneumonia iha nia pulmaun, neebe rezulta nia kondisaun kompleksu uitoan agora.
Antes nee, Papa Francisco susar atu dada iis kauza husi moras Bronkitis no infesaun polimikroba, neebe halo nia kondisaun grave liu. Papa Francisco agora daudaun hetan tratamentu antibiotiku no ho terapia.
Vatikan kansela hotu ona ajenda ofisial Papa Francisco too semana oin hodi bele garante nia kondisaun bele rekupera lalais.
Maski Papa Francisco hasoru problema oin-oin relasiona ho nia saude desde 2021 hanesan hernia, intestines (tee-oan boot), no moras iha nia ain tunur neebe halo nia tenke uza kadeira roda, Papa Francisco hatudu forsa nafatin ba nia aan no husu sarani Katoliku iha mundu reza ba nia iha faze susar hanesan agora nee.
Papa Francisco antes nee vizita mai Timor Leste iha 9 too 11 Setembru 2024 tinan kotuk, sarani sira besik milhaun ida husi rai-laran nomos rai-liur, hamutuk halibur malu tuir misa neebe lidera rasik husi Papa Francisco iha Tasi-Tolu, Dili.
(stl)
