DILI, STLTIMORLESTE.com – Ministru Justisa, Sergio Hornai hatete, Sua Santidade Papa Francisco nia mate lori tristeza ba sarani katolika no lakon figura sentral ida.
“Ohin Konselhu Ministru mai hamutuk ho Primeiru Ministru em ezersisiu ho membru Governu tomak, mai fo omenajen ba ita nia Santu Papa neebe fila hikas ona, sai hanesan faktus notoriu,” dehan Ministru Justisa, Sergio ba jornalista sira iha Licidere, Tersa (22/04/2025).
Nia hatutan, Papa foin daudaun mai vizita rai doben Timor Leste, lori mensajen ida forte ba ida ita, memoria nee importante loos, atu hametin ita nia fee, ita nia kultura, hanesan ema fiar ba iha Igreja Katolika.
Governante nee dehan, ho Papa nia mate, lori nia mensajen ida klaru, Timor Leste lakon nia figura sentral ida hanesan figura ida neebe promove justisa, fo protesaun ba iha ema neebe kiak no vulneravel.
“Mensajen ba ita katak, ita tenke unifika ita nia kultura liu-liu iha relijiaun Katolika no relijiaun sira seluk atu bele manan fraternidade umana. Lakon figura ida neebe simples, ho nia vizaun oinsa mak atu lori Igreja nia misaun no ema sira neebe vulneravel neebe moris iha mundu la iha diskriminasuan maibe iha igualidade,” hatete governante nee.
Tuir observasaun jornalista STL iha terenu haree katak, sarani Katolika barak sente triste, hodi halo orasaun iha fatin neebe prepara ba iha Lesidere nomos Tasi Tolu fatin neebe Amu Papa vizita Timor Leste selebra Eukaristia.
(ter)
