DILI, STLTIMORLESTE.com – Partidu Politiku (Parpol) sira halo dialogu no hakoak malu bainhira sira presiza malu atu maioria iha ukun, maibe durante nee Prezidente Republika, Jose Ramos Horta nunka rona Xanana Gusmão koalia aat FRETILIN.
“Iha Timor ita koalia bebeik dialogu se iha partidu politiku 5, demokrasia funsiona 100%, la signifika ke loron loron ka semana semana lider nasional sira tenke han hamutuk, tenke hakoak malu lae, sira hakoak malu bainhira presiza malu, kuandu FRETILIN presiza karik maioria ida nee hakoak loos KHUNTO, se CNRT presiza maioria nee kontente loos ho PD mais uluk CNRT rasik mak duni sai tiha PD alias politika demokrasia nunee duni laos unika iha timor,”dehan PR, Horta ba jornalista sira, iha Museum Kaikoli, Dili, Kinta (18/09/2025).
Xefe Estadu afirma, haree mos hanesan Amerika ezemplu boot ida demokrasia iha mundu mak amerika, entaun Timor mos laos problema boot ida.
“Hau hasoru Doutor Mari Alkatiri, eis Prezidente Lú Olo, Eis Prezidente Taur Matan Ruak sempre komprementa, kuandu hau vizita ema balu iha Becusse hau nunka falta Dona Isabel nia rate, hau kuandu ba haree May iha Jardim Heroi Metinaro hau nunka falta vizita Saudozu Lasama nia fatin avo save nia fatin,” katak PR, Horta.
Iha biban nee Prezidente Republika hatete, bainhira vizita ba eroi sira iha jardim haree rate balu abandona loos parese familia balu hela dook husi jardim eroi Metinaro. ”Kuitadu kala eroi sira nia familia kala hela iha Bobonaro, Lospalos la konsege mai entau hau mos tau aifunan iha neeba, nemak hau halo, ba hau laiha odiu,” dehan nia.
Nia dehan, tinan hira nia laran partidu hotu kolabora malu ho diak nee grasa, maibe iha Parlamentu Nasional buat seluk tanba sira nia papel, FRETILIN nia papel iha Parlamentu laos basa liman fali ba Governu, se basa liman loron loron entau laos ona posizaun tenke koalia makaas duni mesmo dala ruma ezezeradu, nee mak papel oposizaun nia maibe iha liur laiha problema.
“Hau kuandu hasoru maun Xanana nunka temi liafuan ruma kontra FRETILIN ka kontra Doutor Mari, ka kontra sese, no sira mos nunee nee mak demokrasia se lae ita halakon demokrasia halo tuir deit Korea du Norte mak diak liu nee laiha oposizaun eleisaun mai o hatene ona Se mak Prezidente, nee diak liu laos hanesan ita nia fulan hira nia laran hakilar kampanha tun sae eleitoral sira bosok ita,” katak Horta.
Jornalista: Emerenciana Pinto
Editora: Carme Ximenes
