DILI, STLTIMORLESTE.com – Partidu Politiku (Parpol) labele loke partidu hanesan loke kios, maibe presiza kapasita ema ho kualidade no tau orsamentu ba asuntu Igualidade Jeneru.
Kestaun nee hatoo husi Diretor Nasional Dezenvolvimentu Igualidade Jeneru husi SEI, Jose do Rosario de Carvalho ba jornalista STL iha Delta Nova, Kuarta nee (28/05/2025) hatete, partidu politiku sira labele loke partidu hanesan loke kios, maibe presiza asegura ema ho kualidade no orsamentu ba asuntu igualidade no tau mos importansia ba feto sira hodi asumi kargu importante sira iha partidu laran.
Diretor Nasional Dezenvolvimentu Igualidade Jeneru jusi SEI hatete, SEI iha politika no programa ida mak halo advokasia liu husi ekipa Feto Prontu Lidera ba halo advokasia iha lideransa partidu sira para oinsa buka solusaun hamutuk ho lideransa partidu sira bele fo oportunidade ba inan feton sira no juventude feto sira iha partidu nunee kapasita ho kualiade.
“Iha hau nia formasaun sira hau sempre koalia feto sira tenke hola parte iha lideransa iha partidu atu nafatin iha komitmentu husi formasaun sira atu nunee aban bainrua bele hola parte iha atividade importante sira iha programa Governu nia liu-liu desentralizasaun poder lokal inklui kandidatu ba Xefe Suku no Xefe Aldeia,” katak Diretor Nasional husi SEI.
Partidu Politiku nafatin iha komitmentu atu suporta feto sira, tanba dala barak mos dezefiu ba partidu politiku sira mak iha orsamentu.
“Nee mak hau sempre koalia ho partidu politiku sira liu-liu iha formasaun sira katak ita boot sira loke partidu labele hanesan loke kios, maibe loke partidu oinsa asegura ema ho kualidade no tau mos orsamentu ba asuntu igualidade jeneru, dala ruma iha formasaun sira inan feto sira sempre koalia ami nia partidu ladun tau importansia formasaun ba ami, entaun ekipa prontu lidera neebe lidera husi SEI nafatin iha komitmentu tau orsamentu atu hakbiit no kapasita formasaun ba lideransa feto iha partidu para aban bainrua reprezenta sira nia partidu iha asentu parlamentu iha kualker fatin neebe sira lidera ho kualidade no susesu ba futuru,” katak Diretor.
Nunee mos Diretora Interina Fundasaun Caucus Feto ba Politika, Julieta Fereira da silva mos iha esperansa partidu politiku sira fo oportunidade ba feto sira neebe inklina aan iha politiku nunee bele asumi kargu importante.
“Ita nia esperansa katak partidu politiku sira bele fo tempu no oportunidade ba ita nia feto maluk sira neebe ke iha partidu politiku hodi asesu ba kargu importante sira, ida nee mak ita nia esperansa,” dehan Diretora Interina Caucus.
Iha biban nee nia kontinua husu feto sira nafatin luta ba oin, maske sei iha bareira oin-oin labele lakon esperansa kontinua luta ba oin tanba lei rasik mos garantia feto nia direitu.
(eme)
