DILI, STLTIMORLESTE.com – Estudantes husi Eskola Sekundariu no Ensinu Baziku Nobel da Paz bainhira partisipa iha ezame pasajen, primeiru sira tenke kompleta propinas.
Lia hirak nee hatoo husi Diretor Eskola Sekundariu, Jeremias P. de Jesus ba jornalista STL, Kinta (20/11/2025).
“Karik estudantes moras ruma too agora inan aman estudantes seidauk mai hatoo informasaun mai ami katak labarik nee la tuir ezame, tanba moras. Maibe karik estudantes neebe ninia administrasaun seidauk los, nee presiza hasoru profesor da turma para halo los administrasaun, hafoin tuir ezame. Hirak neebe hatais farda la tuir loron neebe determina ona, nee mos husi eskola haruka fila ba troka tiha iha uma mak mai fali tuir ezame, no sira tenke kompleta propinas,” nia tenik.
Nia hatutan, ba sekundariu kada fulan selu US$ 5, ensinu baziku US$ 4 kada fulan. Estudantes sekundariu neebe mak partisipa iha ezame pasajen nee hamutuk 600 resin, ensinu baziku kuaze 80 resin mak partisipa iha ezame ida nee.
Nunee mos Estudante Rosalino de Jesus Nunes dehan, antes atu ezame selu ona propinas para bele partisipa iha ezame pasajen, no dader mai sedu eskola. Atu nunee tuku 8:00 nee iha ona sala de aula.
Tuir observasaun STL iha terenu katak, estudantes sira iha kada sala partisipa ezame pasajen ho hakmatek, no hetan vizilansia husi sira nian professores, no hirak neebe remata sira nia izame sai ba liur, entrega pontus ezame ba profesores sira.
Jornalista: Jacinta Sequeira
Editora: Domingas Gomes
