DILI, STLTIMORLESTE.com – Evita asidente iha loron boot festa natal no tinan foun nian, pasajeiru sira husu ba Polisia Nasional Timor Leste (PNTL) atu kontrola transporte publiku sira neebe husi Dili ba munisipiu, nunee labele tula pasajeirus liu fali volume kareta nian.
Pasajeirus Bus Lospalos Armindo da Costa husu ba PNTL, hahu agora tenke kontrola ona transporte publiku sira neebe husi Dili ba munisipiu, tanba tinan foun no natal besik ona.
“Daudaun nee asidente barak akontese iha fatin-fatin, festa natal ho tinan foun mos besik ona, tanba nee ita husu ba PNTL tenke kontrolu transporte publiku sira neebe halai husi Dili ba munisipiu no munisipiu mai Dili,” hatete Pasajeiru nee ba STL iha Terminal Bekora, Dili, Kuarta (17/12/2025).
Nia esplika, bus ba Baukau, Vikeke nomos Lospalos nee PNTL tenke orienta ona nia membru sira hodi halo cek point, nunee labele hamosu asidente.
“Ita haree bus Baukau balun sei halai kalan, tula pasajeirus liu volume kareta nian. Tanba nee ita husu para tenke halo cek point, nomos pasajeiru labele tara aan. Polisia tenke fo atensaun makaas ba ida nee, tanba agora asidente akontese iha fatin-fatin,” nia informa.
Nunee mos Pasajeiru Atsabe, Agustinho Soares hatete, haree ba asidente neebe akontese iha fatin balun, hodi halo maluk pasajeiru balun mate iha fatin, nee fo triste boot ba familia.
“Maske ita neebe laos familia i maluk besik, maibe haree asidente hanesan nee halo ita triste tebes. Los duni, dezastre nee ita la espera, tamba buat hotu Maromak nia planu. Maibe hanesan pasajeiru husu ba kondutor sira bainhira tula ema sukat tuir fatin kareta, labele obriga tula deit. Tanba dala ruma mos volume pasajeiru nee makaas liu fali kapasidade kareta nian,” dehan nia.
Nia hatutan, haree ba situasaun nee husu ba PNTL atu kontrola nafatin bus sira, para tula pasajeiru nee sukat tuir forsa kareta nian. Nunee mos kareta balun sei nafatin halai iha tempu kalan.
Iha fatin ketak, Komandante PNTL Munisipiu Dili, Superintendente Xefe Polisia Orlando Gomes dehan, PNTL prontu asegura seguransa ba selebrasaun tinan foun iha teritoriu Timor laran tomak, nunee povu Timor Leste bele festeza ho paz no hakmatek.
Jornalista: Jeniche da Costa
Editora: Domingas Gomes
