DILI, STLTIMORLESTE.com – Pasiente neebe monu ba tratamentu fase raan, kauza husi problema moras rins, tensaun, diabetes, no moras sira seluk, neebe hakarak ka lakohi tenke halo tratamentu fase raan too vida remata.
Haktuir Xefe Departamentu Medisina Interna, Gustavo Rosario da Cruz ba STL, Kuarta nee (20/11/2024).
“Pasiente sira fase raan nee too vida remata, tanba kuandu sira hetan moras rins, diabetes, no moras sira seluk, tanba ita haree kuandu sira la fase raan, sira nia kabun bubu, ain bubu no oin bubu. Ida nee labele, entaun tenke fase raan to vida remata ka seumur hidup,” hatete Gustavo.
Nia dehan, iha pasiente ida neebe fase raan tinan 13 ona, too agora pasiente nee sei fase raan no kondisaun saude diak, no halao atividade baibain hanesan ema sira seluk, maibe tenke kontrolu hahan.
“Agora depende ba ita, tenke lao tuir saida mak Doutor sira dehan ba ita, kuandu sira dehan labele halo ida nee, labele han ida nee, tenke halo tuir. Para ita nia vida bele naruk, no kuandu doutor sira haruka semana ida fase raan dala rua, tenke fase raan tuir orariu neebe fo ba ita. Ita fase raan hotu fila ba uma depois too orariu neebe iha mai fali fase raan,” nia esplika.
Iha fatin hanesan, Pasiente Armindo Maia husi Munisipiu Ermera katak, nia hanesan pasiente fase raan tinan 6 ona, tanba problema rins, maibe fase raan nee bele isin kmaan, no halao atividade normal hanesan baibain.
(jac)
