BAUKAU, STLTIMORLESTE.com – Pasiente nain 2 husi asidente iha Aldeia Mumana, Suku Abafala, Postu Administrativu Kelikai, Munisipiu Baukau, Hospital Rejional Eduardo Ximenes (HoREX) Baukau transfere ona ba Hospital Nasional Guido Valadares (HNGV) Dili, tanba kondisaun grave.
Familia pasiente Egas Pinto haktuir, asidente iha estrada publiku diresaun Baukau-Kelikai area Mumana neebe akontese iha loron 17 Outubru 2025, iha tuku 15:30, involve husi motor Supra X sapa matrikula N.7755 konduz husi Arjino Pinto tula pasajeiru Elias Menezes diresaun husi Baukau Vila atu ba Suku Afaloikai, Postu Baguia foti diresaun Kelikai no too iha area Mumana Suku Abafala hetan asidente, tanba soke malu ho motor Mio beat sapa matrikula U.0552 konduz husi Denis Soares.
Hafoin hetan asidente refere parte karreta multi funsaun no ambulansia transporta kedas vitima nain 3 ba sala emerjensia HoREX Baukau hodi hetan tramamentu mediku, tanba husi asidente refere motorista nain 2 hetan kanek grave.
“Hau nia primo nain 2 nee atu ba Baguai Afaloika sira liu husi Kelikai maibe too Abafala Mumana nain 2 foti ema nia dalan rezulta motor 2 soke malu hau nia primo Arjino kanek todan, tanba hetan pankada makas ran sai husi ibun Elias nee la dun kanek motorista ida fali motor mio nee mos kanek todan,” Egas Pinto hateten iha resintu sala emerjensia HoREX Baukau, Sesta (17/10/2025)
Iha sala emerjensia HoREX Baukau tuir informasaun neebe STL asesu, motorista Denis Soares husi motor mio beat hetan suku pontu neen iha matan fukun parte karuk no kanek raspa iha parte kakorok. Enkuantu Arjino Pinto kondisaun grave, tanba kanek iha rein toos parte karuk no rai sai husi inus no pasajeiru neebe Arjino Pinto tula kondisaun kanek kaman neebe Arjino Pinto submete ba prosesu X-Ray.
No iha loron 18 Outubro 2025 parte dader STL tenta komfirma mediku sira iha sala emerjensia HoREX Baukau, maibe la fo komentariu, tanba pasiente nain 2 hanesan Arjino Pinto no Denis Soares iha sala emerjensia HoREX Baukau liu husi Ambulansia tranfere ona ba HNGV Dili hodi kontinua halao tratamentu saude, tanba kondisaun grave.
Entretantu evidensia hanesan motorizada 2 kompostu motor Supra X ni mio beat Komando Polisia Munisipiu Baukau liu husi ekipa tranzitu asegura ona iha edifisiu Komando Polisia Baukau.
Jornalista: Tomas Reis
Editora: Carme Ximenes
