DILI, STLTIMORLESTE.com – Pasiente iha Klibur Domin no Ismaik Tibar simu felisitasaun ho parsel natal husi Prezidente Republika Jose Ramos Horta ho Primeiru Ministru Kay Rala Xanana Gusmão.
Parsel natal neebe entrega nuudar domin husi Prezidente Republika Jose Ramos Horta no Primeiru Ministru Kay Rala Xanana Gusmao nian ba pasiente sira neebe hela iha Klibur Domin no Ismaik Tibar, hodi halo kontente sira iha tempu loron boot natal.
Atividade nee organiza husi Prezidensia Republika liu husi Unidade Servisu Sosiedade Sivil no asuntu Sosial neebe lidera husi Asessor Quintiliano Moniz, hodi fahe parsel natal hamutuk 50 resin.
Parsel natal nee Prezidente Republika, Jose Ramos Horta hamutuk ho IX Governu Konstitusional neebe lidera husi Kay Rala Xanana Gusmao hatoo felisitasaun natal 2025 no ksolok tinan foun 2026 liu husi fahe parsel iha Sentru Reabilitasaun Klibur Domin no Ismaik iha suku Tibar, Munisipiu Likisa, Sabadu (20/12/2025).
Felisitasaun nee hatoo husi Reprezentante Prezidente Republika no Primeiru Ministru nian neebe kompostu husi Visi Primeiru Ministru dahuluk, Francisco Kalbuadi Lay no Adjunta Xefe Kaza Sivíl, Henriqueta Maria da Silva.
Adjunta Kaza Sivíl informa, prezensa Xefe Estadu no Xefe Governu nian ba natal ho pasiente sira, laos deit ho modu diretu, maibe atividade nee mos reprezenta no lori pasiente sira hodi sente prezensa direta husi Xefe Estadu ho Governu, inklui sira nia domin no karinu iha festa natal nee.
Nunee mos Visi Primeiru Ministru reafirma, Xefe Estadu Ramos Horta no Xefe Governu Xanana Gusmao la marka prezensa, maibe hatoo liamenon atu pasiente sira nafatin kuidadu an, tuir instrusaun ba kontrolu konsumu ai-moruk nian, inklui tuir regra sira neebe Doutor sira fo, no ikus liu hatoo ksolok natal no tinan foun.
Jornalista: Emerenciana Pinto
Editora: Domingas Gomes
