DILI, STLTIMORLESTE.com – Timor oan sira tenki prepara aan didiak hodi haree oportunidade sira atu kompete iha merkadu, laos kestiona fali Xineza sira nia prezensa iha rai laran.
Deputadu Bankada CNRT, Patrocino Fernandes hatete, Timor Leste restaura ninia independensia iha tinan 2002 nee, mundu nee tama ona ba global no opta ona politika sira neebe hodi hanoin katak, independensia hanesan nasaun konvivensia nuudar nasaun tenki hatene katak Timor Leste mos hola parte ida integrante husi mundu nee.
Tuir nia, haree husi aspetu ekonomia iha rai laran ema husi nasaun sira seluk sei mai domina Timor Leste, maibe situasaun ida neebe presiza ema hotu-hotu tenki iha hanoin ida oinsa bele prepara aan hodi kompete atividade negosiu sira iha rai laran.
Tanba Timor Leste adapta sistema merkadu livre, tan nee Governu labele bandu ema estranjeiru sira atu faan sasa iha rai laran, maibe Timoroan sira mak tenke buka daudaun ona oinsa integra aan ba iha situasaun global ida agora nee.
“Maibe nuudar Timoroan ita hotu-hotu mak tenki hatete katak ita iha oportunidade, maibe halo nusa mak ita tenke prepara ita nia aan atu aproveita oportunidade sira neebe iha, nunee labele iha pozisaun ida hanesan apatia deit ba situasaun hotu-hotu neebe iha hodi bele prepara ita nia hodi kompete ho sira,” hatete Deputadu Patrocino ba jornalista sira, iha resintu Parlamentu Nasional, Sesta (05/12/2025).
Patrocino hatutan, estadu Timor presiza haree situasaun ida agora oinsa mak bele kria kondisaun ba Timoroan sira liu husi hadia lejislasaun, nunee bele apoiu Timoroan sira hodi kompete iha merkadu.
“Ita ejize nafatin ba estadu atu kria kondisoens, maibe kondisaun hotu neebe estadu kria, ita nuudar Timoroan ita buka esforsu para halo nusa mak bele partisipa, ida nee kapasita ita nia aan hodi bele partisipa nee ga lae. Estadu nafatin presiza buka meus kria mekanizmu iha limite instrumentu legais sira hodi halo nusa mak ita bele dehan katak, parte ida neebe mak sira husi estranjeiru bele hola parte no parte ida neebe mak ita bele hola parte, tan nee Timoroan sira tenki aproveita didiak liu husi instrumentu neebe estadu prepara hodi kompete ho ema seluk,” dehan nia.
Jornalista: Alberto Menezes
Editora: Carme Ximenes
