DILI, STLTIMORLESTE.com – Bankada PD iha Parlamentu Nasional (PN) husu ba governu atu labele fo ona tratamentu saude ho gratuita ba povu, tanba bele hatoman sira dependente ba governu.
Visi Primeiru Ministru no Ministru Koordenadór ba Asuntu Sosiál, Mariano Assanami seidauk bele rona pedidu Deputada no Deputadu sira iha Parlamentu Nasional (PN) hodi haruka povu selu, tanba daudaun nee mos povu la simu tratamentu saude ho gratuita, tanba governu mak selu.
“Agora daudaun mos lo-loos nee la gratuita ida, ita oferese gratuita mais estadu mak selu, estadu mak tau osan, neebe buat ida nee estadu mak garante ba povu ,” hatete Assanami ba jornalista sira iha PN loron, Kinta (14/11/2024) .
Nia esplika, Debate Jeneralidade Orsamentu Jeral Estadu tinan 2025 nee hodi hatan pedidu Deputada Maria Tereza Gusmão nian neebe husu atu governu labele ona fo kuidadu saude ba povu rai doben ida nee.
Nia tenik, Governu sei la rona pedidu nee tanba Konstituisaun Republik Demokratika Timor Leste nian garante saude no edukasaun nee gratuita ba povu. Maske dala ruma sistema gratuita nee garante nia kualidade hodi implika ema barak hili dalan ba iha klinika privadu no estranjeiru.
“Ba oin ita bele haree opsaun sira nee, tanba garante nee liu-liu ba povu sira neebe mak ita haree nia ekonomia sei fraku hela, ita tenke nafatin adere, reforsa nafatin ita nia politika saude no edukasaun nee gratuita ba ita nia povu, tanba ita hatene katak, iha fatin balun gratuita nee kualidade la diak tiha, entaun ema hili opsaun ba fali swasta, hanesan mos ita agora daudaun tenke ba liur,” nia esplika.
Nia deklara, atu garante kualidade kuidadu saude neebe mak diak ba povu iha futuru oin mai, governu tenke hasae kualidade ekipamentus nomos kualidade rekursus umanus nian, tanba liu husi kualidade ekipamentu no rekursu bele minimiza ona numeru transferensia pasiente ba rai liur no seluk tan, neebe tenke sai politka estadu nian.
“Tanba laos governu ida sae mai dehan governu ida nee la halo, ou governu ida halo too iha klaran nia lakohi, nia hakarak uza fali seluk nee lae,” hatete Assanami.
Nia hatutan, saude no edukasaun tenke sai politika estadu nian neebe entidades hotu, no tenke konsiente ida nee, tanba ida nee tenke forma ema hodi lori rai ida nee ba oin no ida seluk tenke salva ema hodi entidades hotu tenke moris ho saudavel hodi kontribui rai ida nee ho efetivamente.
Iha fatin ketak, Akademista UNTL, Jose Mourinho esplika, governu debate hela OJE tinan 2025 nian, maibe husu atu aloka orsamentu boot ba Saude no edukasaun, atu nunee iha povu kbiit laek sira nia oan hotu-hotu bele asesu edukasaun neebe iha kualidade, no povu kiik sira bele hetan tratamentu saude neebe dignu.
(jen)
