DILI, STLTIMORLESTE.com – Bankada Partidu Demokratiku (PD) iha Parlamentu Nasional (PN) husu Ministru Obras Publikas atu aselera lalais reabilitasaun estrada iha Munisipiu Ermera.
Xefe Bankada Partidu Demokratiku (PD), Manuel Noronha hateten, Ministru Obras Publikas presiza aselera lalais projetu reabilitasaun estrada nee, tanba populasaun sira iha Munisipiu Ermera liuliu iha postu administrativu sira neebe mak durante nee hasoru hela difikuldade iha estrada tanba kondisaun la diak hotu.
Nia dehan, kondisaun estrada iha Munisipiu Ermera la diak, tanba foin lalais nee komisaun G ba halo fiskakiliazasaun iha Hatolia, maibe labele too iha neeba tanba kondisoens estrada mak la diak.
“Atu hatete deit katak Ministru Obras Publikas presiza tau atensaun ba kondisoens estrada nee, tanba ita bele hatete katak Ermera nee iha produtu lubuk hanesan Kafé, Baunila no seluk tan neebe presiza tula mai Dili hodi bele faan,” hatete Deputadu Manuel Noronha ba jornalista sira, iha resintu Parlamentu Nasional, Tersa (09/09/2025).
Hanesan Reprezentante Povu, Manuel preokupa bainhira estrada nafatin aat hanesan nee, tama ona fulan Setembru la kleur tan tama ba fulan Outubru Novembru udan mai fali ona. Tanba MOP presiza aselere lalais reabilitasaun estrada nee tanba orsamentu aprova ona.
Aleinde nee nia mos kestiona se tenderizasun seidauk lao mak Ministru Obras Publikas presiza aselera lalais prosesu nee. Tenderizasun lao tia ona karik implementa ona, nunee bele ajuda populasaun sira iha Munisipiu Ermera, atu bele fasilita lori sira nia produtu mai faan iha nasional.
Jornalista: Alberto Menezes
Editora: Carme Ximenes
