DILI, STLTIMORLESTE.com – Provedor Direitus Humanus no Justisa (PDHJ) halo abertura ba workshop ho tema “Promove Direitus Umanus iha Timor Leste, Alinamentu Lejizlativu Nesesariu no Direitus Humanus Iha Ligasaun Espesialmente ba Diretus Diversidade Ema ho Identidade LGBTQI no EhD”.
“Halo abertura kona-ba workshop ida neebe koalia kona-ba ezistensia no direitu komunidade LGBTQI, asuntu ida neebe importante delikadu iha ita nia sosiedade, realidade sosial neebe Provedor hanesan entidade neebe Estadu estabelese atu promove direitus umanus atu halo advokasia ba direitus umanus liu-liu ba grupu marganizadu sira,” dehan Provedor Direitus Humanus no Justisa, Virgilio da Silva Guterres ba jornalista sira iha Kruz Vermelha, Tersa 25/03/2025.
Nia hatutan, haree katak komunidade LGBTQI sai hanesan komunidade neebe sosiedade ho meius oin-oin tenta atu ignora tenta atu nega, maibe sira nia ezistensia sai realidade.
Nia sublina, enkoraja organizasaun sira neebe iha atu se kabas ba malu hodi kontinua halo advokasia, liafuan neebe hola parte iha kampanha global, laos iha diskursu politiku deit no laos iha kampanha politika deit, maibe iha realidade sosial ita sei la husik ema ida mesak iha kotuk, ema ho defisiensia ema ho orientasaun seksual oin-oin tenke hateke hanesan hodi lao ba futuru.
Reforsa, media kobertura kona-ba asuntu ida nee sei menus, se barak mos barak liu iha aspetu ida neebe laos promove sira atu dehan sira nee iha direitu, no barak liu buka hanoin atu hateten sira nia ezistensia nee hanesan defisiensia iha sosiedade.
Tanba nee se hakarak promove sira, baze atu analiza no fo prespektiva nee haree dokumentus sira kona-ba direitus humanus ita nia konstituisaun no faktu internasional sira mak sai referensia ba ita nia analiza. No se haree fali ba iha relijiaun no valor kultura antigu nian, ita sei kontinua sente ema moris ho LGBTQI hanesan ferik no katuas sira dehan nee sorte aat.
Provedor dehan, durante nee seidauk haree media nia kobertura atu haree kona-ba sira nee, komunidade sira neebe presiza hetan atensaun, presija promove sira nia liberdade.
Akresenta tan, media hanesan lian laek ba ema, tenke tau atensaun ba asuntu nee, atu haree dehan sira nee dignu tuir artigu neebe hateten, respeita ba dignidade humana, tanba sira mos iha dignidade no hetan tramentu hanesan iha lei sosiedade no faze moris nian hanesan.
Iha fatin hanesan, Diretora Arquerius Timor Leste, Bella Galhos dehan, workshop nee atu publika sai kona-ba peskiza neebe sira halo, no hatudu katak violasaun diskriminasaun kontinua iha, tanba too ohin loron Estadu liu husi Governu, Parlamentu kontinua ignora ezizensia LGBTQI.
“Kuaze 70% komunidade LGBTI hetan diskriminasaun, iha kuaze aspetu hotu iha edukasaun no servisu sira, akontese mos balu iha familia uma laran, familia la simu, workshop nee atu hasae konhesimentu komunidade sira nian, hodi hatene kona-ba komunidade LGBTQI,” dehan nia.
Nia sublina, no husu atu kria lei ida atu proteje komunidade sira atu hetan tratamentu hanesan .
(ter)
