BAUKAU, STLTIMORLESTE.com – Provedoria Direitu Umanus no Justisa (PDHJ – sigla portugues) fasilita formasaun ba kargu xefia sira iha Munisipiu Baukau.
PSHJ, Virgílio da Silva Guterres hateten, formasaun refere foku ba asuntu kombate korupsaun no pratika diak ba boa governasaun, tanba nee atu kapasita xefia sira mak nuudar servidor Estadu no sai ajente kombate korrupsaun inklui sai ajente hadia servisu administrasaun publiku tuir konfiansa povu nian.
“Ohin halo abertura ba programa formasaun ba kargu xefia sira bazeia ba kuadru kooperasaun entidades estadu haat, PDHJ Komisaun Anti Korrupsaun, Komisaun Funsaun Publika nomos Inspetor Jeral Estadu nian,” hateten Virgílio ba jornalista hafoin abertura formasaun ba kargu xefia sira iha Uatulete, Baukau, Segunda (14/04/2025)
Provedor nee sublina, formasaun refere laos foun ba kargu xefia sira, tanba antes fasilita uluk ona, maibe formasaun refere nuudar xilazen hodi hafanu ba konhesimentu sira neebe antes hetan ona kontinua iha dedikasaun profesional.
Nia fundamenta, materia husi PDHJ neebe fasilita kargu xefia sira durante formasaun, papel knaar no kompentensia tuir konstituisaun inklui lei nu. 07/2004, aleinde mos boa governasaun no medida kombate korupsaun bazeia ba kombate korupsaun nian.
Provedor nee informa, formasaun hanesan implementa ona iha Munisipiu Kovalima, RAEOA, Dili no Baukau, maibe sei kontinua planu kobre territoriu nasional hodi eleva koinhesementu diak liu tan ba dirijente sira.
“Dirijente sira tenke iha empatia, tenke koinhese nia elementu sira, buka kontrola sira, laos buka tau falta deit ba nia ema sira neebe la mai, maibe buka hatene, tanba dala ruma infrenta problema uma laran,” Katak Virgílio.
Provedor nee akresenta, formasaun refere atu eleva konhesimentu ba Kargu Xefia atu hatene no kontrola funsionariu sira neebe tama servisu tarde no la tama servisu, tanba dala ruma okupadu nunee la informa ba dirijente, maibe hanesan dirijente tenke buka hatene liu husi kontaktu, tanba kada dirijente hetan subsidiu ba komunikasaun atu halo kontaktu ho funsionariu no seluk tan ba asuntu servisu.
“Ba dirijente sira halao servisu tuir komprimisiu neebe espresa iha momentu simu pose juramentu, servi povu ho didiak bazeia ba konstituisaun no lei, tanba juramentu laos kestaun ba lei deit, maibe kestaun moral no religioso tuir ida idak nia fiar,” Virgílio sujere.
Entretantu formasaun refere realiza durante loron tolu neebe hahu iha loron 14 too iha loron 17 Abril nee, iha salaun PDHJ Delegasaun Territorial Uatulete Baukau no partisipa masimu husi kargu xefia sira husi Diresaun Ministeriu sira neebe destaka iha Munisipiu Baukau.
(tom)
