DILI, STLTIMORLESTE.com – Provedoria Direitu Umanu no Justisa (PDHJ) enkoraza Governu atu aloka orsamentu razoavel ba dezenvolvimentu labarik, liu-liu ba bem estar familia nian.
Kestaun nee hatoo husi Provedor Direitu Umanu no Justisa (PDHJ), Virgilio da Silva Guterres ba jornalista sira iha Novu Turizmu Kuarta (20/11/2024).
Nia dehan, tuir sira nia haree kada loron labarik sira kontinua moris iha dalan ninin liu-liu faan sasan numeru aumenta, tanba nee enkoraza Governu atu bele tau orsamentu razoavel ba dezenvolvimentu labarik liu-liu iha familia nia.
Tanba falhansu nee husi estadu atu garante bem estar, liu-liu alokasaun orsamentu neebe razoavel ba setor save sira, edukasaun, saude no agrikultura, atu nunee bele garante bem estar família nian. Bainhira família nee moris ho diak, inan aman asesu ba servisu no rendimentu natoon ba oan sira, sira nia oan sira sei la hetan obrigasaun ida atu ba faan sasan iha liur neeba.
“Entaun hanesan provedor buat neebe hau hakarak hatete mak preokupa ho situasaun ida nee, tanba labarik sira aumenta, no buat neebe ami halo mak kontinua enkoraza Governu atu aloka orsamentu ida neebe razoavel ba dezenvolvimentu labarik, liu-liu ba bem estar família nian, neebe inklui hadi’a labarik nian nutrisaun,” katak nia.
Nia hatutan, Governu presiza aloka orsamentu ba setor sira neebe mak importante, nunee bele hadia mos povu nia moris.
“Ita hotu hatene taxa stunting 47% nee laos notísia diak ba rai Timor, 47% nee labarik sira neebe atu sai futuru nee, mais sira sofre stunting rais badak, depois 40 ital%, ita nia populasaun sei moris iha lina pobreza nia okos, depois tinan 20 resin ita problema husi neebe, hau nia hanoin hau fiar katak, tanba ita ladun investe iha setor produtivu hanesan agrikultura, edukasaun no saude, ida nee setor save,” katak nia.
(eme)
