DILI, STLTIMORLESTE.com – Provedor Direitu Umanu no Justisa (PDHJ) lamenta ho atuasaun autoridade seguransa balu, neebe tama too ba iha aredores Univerdidade Nasional Timor Lorosae’e (UNTL).
“Ami lamenta mos ho Polisia tama resintu Universidade nian, hau hanoin ida nee asaun neebe lolos labele akontese, tanba Universidade entidade otonomo ida razaun saida deit, Polisia labele tama no baku estudante iha Universidade laran,” dehan PDHJ, Virgilio da Silva Guterres ba STL, iha Kaikoli, Dili, Kuarta (17/09/2025).
Tuir Provedor ida nee, violasaun hasoru independensia Instituisaun hanesan Universidade, no baku estudante violasaun Direitus Humanus, tanba nee husu ba iha Komando, kontinua atua ho esperitu ida loron primeiru nian.
Maibe manifestasaun hanesan ezersisiu konstituisional sidadaun nian tantu grupu ka ema ida iha liberdade konstituisional, katak konstituisaun garante liberdade ida nee hodi hato sira nia opiniaun
Tanba lei regula manifestasaun tenke lao ho meius pasifiku dame, no Polisia iha kompetensia atu limita halo reistresaun no intorupsaun banhira manifestasaun, iha tendensia atu perturba ordem publiku.
Iha fatin ketak, Akademiku UNTL Sebastiao Dos Santos sente triste haree ho atuasaun PNTL nian.”Sente triste hare situasaun nee tuir lolos estudante sira iha ona resinto Universidade, labele tama tuir tan sira ba,” dehan nia.
Nia husu atu iha manifestasaun sira hanesan nee, tenke iha koperasaun diak entre PNTL no manifestante sira, hodi labele hamosu dezentedementu iha terenu.
Jornalista: Terezinha De Deus
Editora: Carme Ximenes
