DILI, STLTIMORLESTE.com – Prevedór Direitus Humanus no Justisa (PDHJ), Vírgilo da Silva Guterres “Lamukan” sei husu ba Tribunál Rekursu (TR) hodi halo fiskalizasaun abtrata ba desizaun Ministru Interiór (MI) Francisco da Costa Guterres neebe deside la halo promosaun deviza ba Superintendente Polísia Julia da Gama, Sabadu foin lalais nee.
“Prontu, nee koalia kona-ba nia Governasaun ninian nee ami sei haree prosesu promosaun, se nee bazeia ba kompetensia Komando nian ka kompetensia Governu liu-liu Mínisteriu Interiór atu halo, maibe buat neebe PDHJ atu tama iha laran nee katak, kualker desizaun neebe atu promove ofisiál públiku sira tenke respeita prinsipiu boa governasaun, katak ita halo dekretu ka diploma ruma tenke baze ba lei no tenke bazeia ba analize neebe klean, katak ema neebe mak ita atu promove nee laos tanba nia mane ka nia feto ou laos tanba nia besik ita,” hatete Prevedór Direitus Humanus no Justisa (PDHJ), Vírgilo da Silva Guterres “Lamukan” ba jornalista sira iha nia knaar fatin Praia dos Esquteiros Dili, Segunda nee (23/03/2026).
Nia dehan, atu melhora instituisaun estadu lao diak mak Primeiru Ministru (PM) koalia ona iha munisípiu sira.
“Atu evita buat ida familiarizmu, nepotizmu nee, espiritu labele haree ema nee, tanba ita nia familia, maibe nia merese duni katak nia liu prosesu sira neebe entidade tau, katak nia respeita Kódigu Konduta, prosedimentu promosaun neebe iha no nia iha neeba duni. Agora se ema nee tama tiha lista atu ba formatura mak hasai nee hamosu kestaun no ami sei fiskalizaun ba ida nee” nia subliña.
Kazu Superintendente Polísia Julia da Gama nian nee PDHJ seidauk bele too ba konkluzaun violasaun direitus uumanus.
“Tanba ami presiza halo fiskalizasaun, maibé pelu menus setimentu injustisa nee mosu ona iha ema. Ema ida nee sai vítima ba prosesu nee, tanba ultimu minutu, pesoalmente katak nia família hatene ona, nia oan sira hatene ona nia família barak mos hatene ona katak nia atu promove, dala ruma sira prepara tan atu ba partisipa ninian promosaun, mas depois nia la mosu iha neeba, sentimentu justisa nee ema nee sofre tiha ona”, nia katak.
Vírgilo afirma, agora presiza investigasaun, presiza fiskalizasaun atu haree, se kuandu desizaun la tuir prosedimentu ou padraun boa Governasaun ninia, ita bele dehan nee violasaun Direitus Humanus.
(jen)
