DILI, STLTIMORLESTE.com – Padre Domingos Maubere daudaun nee nia kondisaun iha ona mudansa kompara ho loron hirak liu ba, maibe nia kondisaun jeral sei iha kritiku nia laran.
Nia dehan, relasiona ho Padre Domingos Maubere nia kondisaun nee, iha ona mudansa kompara ho loron hirak liu ba, tanba iha odikalan Amu “Du” komesa loke matan ona, maibe nia kondisaun nafatin kritiku.
“Amu Du baixa iha nee hamutuk loron neen (6) maibe iha ICU nia baixa loron tolu ona. Nia kondisaun nafatin kritiku maibe kondisaun klínika kompara ho dia anterior komesa iha mudansa oituan ona, tanba nia loke ona matan, CS tun ba tolu (3) agora sae ona ba hitu (7), atu sukat nia nivel de konsiensia maibe nafatin ho ventilador signifika katak nia kondisaun iha faze kritiku nafatin,” hatete Diretór Servisu Apoiu Diagnostiku Terapeuriku iha Ospitál Nasionál Guidu Valadares (HNGV), Vidal de Jesus Lopes ba jornalista sira iha nia knaar fatin HNGV Bidau, Kuarta (14/05/2025).
Nia esplika, daudaun nee nia valor normal sae ona ba 15 kompara ho loron rua liu ba tun ba valor tolu (3) no husi valor nee atu evalua kona-ba klínika pasiente nia. Tanba kada loron médiku sira nafatin akompanha no intervensaun ba nia tratamentu saude.
“Kona-ba nia nivel konsiensia nee nia valor normal sae ona ba sanulu resin lima (5) kompara ho loron rua liu ba nee tun ba valor tolu (3), ida nee atu evalua nia loke matan ga lae? nia tenta atu koalia ga lae? nia book aan ga lae? Atu haree ida nee hotu nia valor, nee kada pontus iha, maibe nia kondisaun nafatin kritiku no depende ba nia evaluasaun klínika pasiente, tanba kada loron ekipa mediku akompanha no intervensaun ba tratamentu tuir nia moras,” nia deklara.
Nia esplika, relasiona ho sarani sira nia vizita ba iha Hospital Nasionál Guidu Valadares (HNGV) iha sala Intensive Care Unite (ICU), nee reduz ona tanba kuidadu intensivu nee iha pesoal saude sira, nunee familia sira labele hein permanente pasiente iha sala ICU.
Nia deklara, vizita iha ICU nee fatin esterilizadu laos familia pasiente hein kedas nia sorin nee lae, too nia tempu no oras mak foin bele tama ba no iha oras 12:00 too uma hora tanba nia intervensaun hotu-hotu iha kuidadu intensivu nee hotu-hotu pesoal saude mak halo atu fo han, fo hariis no troka nia roupa fo ai-moruk no buat hotu pesoal saúde mak halo tanba iha neeba rasiu nee, infermeiru no infermeira ida mak haree ba pasiente tanba kuidadu intensivu.
“Maibe iha vizita nee a nao ser ita nia ema boot sira ka leader sira mai haree fo toleransia tanba sira servisu mai haree liu deit entaun sai ona, familia mós la hein permanente”, nia relata.
Nia koalia konaba regras vizita pasiente nee regras sira ne’e laos foin mak estabelese, maibe estabelese kleur ona, tanba nee familia pasiente tenke kumpri regras neebe mak iha ona. No iha loron hirak liu ba ne’e sarani sira nakonu iha sala ICU-HNGV nia oin hodi halo orasaun ba Pe. Domingos Maubere nia saude.
“Kona-ba regras nee laos foin mak Amu Du nia moras mak implementa maibe regras nee aplika antes kedas ba kualker pasiente. Iha loron hirak liu ba nee sarani sira mai barak duni halo orasaun iha ICU entre sala ICU no sala operasaun nia fatin no disturbiu oituan movimentu pesoal saude no pasiente sira neebe mak ba mai, ami informa ona ba Amu sira atu halo orasaun iha fatin tanba Ospitál nee rasik iha Kapela bele halo orasaun ba iha Kepela HNGV no Gruta HNGV,” katak nia.
Iha fatin hanesan, Juventude Julicia do Carmo informa, Padre Domingos Maubere sei kontinua baixa iha ICU hodi halao tratamentu saude, maibe ema komesa posting iha pájina Facebook katak Padre Domingos Maubere laiha ona.
“Ita nuudar sarani katolika tenke reza ba Aman Maromak hodi salva Padre Domingos Maubere nia vida, Amu seidauk mate ema dehan mate ona, labele hanesan nee, nee ita hotar ona Amu, hau sente triste wanhira ema tau iha media sosial hanesan nee,” nia deklara.
Antes nee iha loron 11 Maiu 2025, Primeiru Ministru Kay Rala Xanana Gusmão mos halao ona vizita ida ba Padre Domingos Maubere iha ICU-HNGV maibe kondisaun saude krítiku.
Fo hanoin fali katak Padre Domingos Maubere halao ona tratamentu ba nia saúde dala barak iha rai liur, maibe doutor sira foti liman no too agora seidauk rekupera no sei kontinua halo tratamentu iha ICU HNGV.
(jen)
