DILI, STLTIMORLESTE.com – Iha misa agradesimentu ba Loron Restaurasaun Independensia 20 Maiu ba dala 23, Padre Juvito Rêgo de Jesus hateten, susesu ba ukun rasik aan ida nee iha xave tolu importante mak hanesan bensaun, perdaun no hadomi malu, no ukun rasik aan nee laos prezente maibe nee bensaun ida.
Misa agradesimentu ba Loron Restaurasaun Independensia 20 Maiu ba dala -23 nee, realiza iha Igreja Parokia Imaculada da Conceição, Balide Dili, neebe prezide husi Padre Juvito Rêgo de Jesus Araujo.
“Ita hotu tenke sai bensaun ida, ita nia hahalok, liafuan, adezaun ba saida deit tenke sai bensaun ida, tanba bensaun ida nee Maromak haraik mai ita hotu neebe sai husi tinan 1974 mai nee hatene katak nee bensaun, tanba ukun rasik aan nee laos prezenti maibe nee bensaun”, dehan Pe. Juvito liu husi nia omilia wainhira prezide misa agradesimentu ba Restaurasaun Independensia ba dala 23 iha igreja Balide, Dili Segunda (19/05/2025).
Padre Juvito haktuir, xave daruak, perdaun presiza perdua malu, liafuan sira neebe halo mate perdua malu, buat barak tebes nee ita nia leten nakselok malu seidauk hetan nia dalan loos, tanba perdaun nee seidauk lao, no perdaun nee tenke ho laran, labele fo perdaun tanba motivu ida.
“Xave ikus mak hadomi malu, hanesan iha evanjelhu hateten hau hadomi imi, nee sasukat ita presiza tebes, dala ruma ema hanoin selebrasaun 20 Maiu nee ba ema ukun nain sira deit, maibe nee Timoroan sira hotu, ita presiza perdaun ida nee sai bensaun ida no besaun ida nee presiza hadomi malu atu ukun rasik aan ida nee lao diak tebes”, nia dehan.
Iha selebrasaun misa agradesimentu ba Loron Restaurasaun Independensia 20 Maiu ba dala-23, Padre Juvito mos lori povu no sarani sira nia naran hakarak hatoo obrigadu no deskulpa ba ukun nain sira neebe halao knaar iha rai ida nee, tanba dala barak la hatene atu koopera ho programa governu nia.
“Ami nia obrigadu ba imi iha loron ida nee, imi la perfeitu duni maibe ami mos la hatene katak oportunidade atu lao dala barak ami nia ibun, hahalok, kolaborasaun la tulun imi halao ukun ida nee, ba ida nee ami husu deskulpa, tamba dala barak ami la hatene koopera, kolabora programa Governu nian ami tolok, trata, maibé ami husu ita boot sira nia pasiensia keta neon nakraik hakat ba oin hamutuk buka mekanizmu diak atu nunee ukun rasik aan ida nee lao ba oin, hamutuk ho imi povu sente katak iha dalan neebe loos”, katak padre Juvito.
Hafoin misa agradesimentu ba Loron Restaurasaun Independensia 20 Maiu ba dala -23 remata, membru Governu no sarani sira hotu lori kedas aifuana ba kari iha semiteriu Santa Kruz, Dili.
(EST 1)
