DILI, STLTIMORLESTE.com – Prosesu Fiskalizasaun lei Pensaun Vitalisia neebe hatama ba iha Tribunal Rekursu (TR), prosesu sei lao hela no seidauk iha desizaun.
Tuir Prezidente Tribunal Rekursu, Afonso Carmona katak, prosesu hotu desizaun kuandu sai ona, tenke notifika parte sira, maibe seidauk notifika, hatudu katak prosesu nee lao hela no seidauk iha desizaun husi Juiz prosesu neebe kaer prosesu nee.
“Prosesu hotu nia finalidade sempre notifika, karik seidauk notifika signifika katak prosesu seidauk hotu, tanba teknis nee Juiz prosesu mak hatene,” dehan Prezidente Tribunal Rekursu, Afonso Carmona ba jornalista sira iha Kaikoli, Segunda (16/03/2026).
Nia hatutan, kuandu dehan seidauk notifika, hatudu katak prosesu nee sei lao hela, no seidauk iha desizaun husi Tribunal, se iha ona desizaun mak ofisial husi Tribunal sei notifika parte sira.
Esplika, prosesu nee distribuisaun ba iha Juiz prosesu, tanba nee Juiz ida kaer nee seidauk finaliza, signifika katak prosesu seidauk hotu.
Iha fatin ketak, Jurista Sergio Dias Quintas dehan, prosesu iha ona Tribunal Rekursu hatudu katak prosesu sei lao hela, importante mak estudante sira tenke pasiensia hodi hein nia desizaun.
“Hau nia hanoin saida mak Prezidente TR hateten ona nee klaru katak, fiskalizasun abstrata neebe hatama hodi haree kona-ba konstitusionalidade lei pensaun vitalisia nia prosesu lao hela,” dehan Jurista.
Hatutan tan, estudante sira tenki kalma no pasiensia hein prosesu lao tuir nia transmitasaun, fiar katak to tempu ida Juiz prosesu sei fo nia desizaun.
Afirma tan, tuir norma prosesual Juiz ida labele nega justisa, iha artigu 7 husi Kodigu Prosesu Sivil dehan katak, Juiz la bele rekuza halo audiensia, julgamentu ka desizaun ba kazu nebee ema ruma hato ba Tribunal.
Alende nee, Akademiku UNTL, Sebastião Dos Santoa dehan, husu TR fo sai ona desizaun ba fiskalizasaun nee, tanba publiku hein hela husi Tribunal.
Hanesan Akademiku sujere, atu parte hotu tau konfiansa ba iha servisu Tribunal nian, atu desizaun neebe sira foti bazeia ba lei no desizaun neebe justu.
(ter)
