DILI, STLTIMORLESTE.com – Ensinu Baziku Filial (EBF) Aituri Laran kestiona pedidu husu apoiu profesores neebe hatama ba Ministeriu Edukasaun (ME), too agora seidauk hetan resposta.
Kestaun nee hatoo husi Koordenadora EBF Aituri Laran, Gracinda Morreira de Araujo Tilman ba STL, iha nia knaar fatin, Kuarta nee (13/11/2024).
“Maske ami menus profesores, maibe ami nian atividade ensinu aprendizajen kada loron lao hanesan baibain, tanba ami nia profesores neebe moras, ami nian profesor seluk bele taka iha fatin, hodi fo materia ba ita nian estudante sira, ami nia total profesores iha nee hamutuk 24, maibe nee seidauk sufisiente ba ami, tanba ami nia profesores balun moras, no voluntariu sira nee mak ajuda ami,” dehan nia.
Nia hatutan, sala de aula neebe mak laiha profesor, maibe husi eskola nafatin buka maneira oinsa mak bele taka iha sira nian fatin, atu nunee labele difikulta estudante sira iha materia, nee duni materia kada loron ba estudante sira tenke lao normal hanesan baibain, tanba profesor sira hanorin taka malu.
“Ami nia total profesores hamutuk 24, total estudantes 1.042, sala aprendizajen hamutuk 10. Ho profesores neebe mak menus, ami halo ona pedidu ba ME, ami husu tan profesores nain 6 mai iha ami nian eskola, maibe too agora seidauk hetan resposta husi ME, pedidu nee ami hatama iha fulan hirak liu ba, no ninia rezultadu mak seidauk iha,” katak nia.
(jac)
