DILI, STLTIMORLESTE.com – Segundu Komandante Jeral Polisia Nasional Timor Leste (PNTL), Komisáriu Jerál Polisia Pedro Belo apela ba Komando Munisípiu Dili atu aumenta tan frekuensia Membru PNTL sira atu halo patrulhamentu hodi halo seguru seguransa iha sidade Dili.
Komisariu Pedro Belo hatoo apela nee, hafoin tula promosaun deviza tranzitoriu no por-antiguidade ba membru Komando PNTL Munisipiu Díli hamutuk nain 409.
“Razaun neebe hau apela atu membru PNTL sira aumenta frekuensia patrulhamentu, tanba konsidera Dili sai hanesan kapital nasaun nian no nuudar sentru ba Administrasaun Governu nian no orgaun haat nee, nomos instituisaun estadu sira,” hatete Segundu Komandante Jeral Polisia Nasional Timor Leste (PNTL), Komisáriu Jerál Polisia Pedro Belo ba jornalista sira iha nia diskursu ih CCD Merkadu Lama, Dili, Seguda lokraik (26/05/2025).
Nia tenik, kapital Dili mos sai sentru atividade polítika no atividade sira seluk tan. Nunee kresimentu populasaun iha Dili barak no nivel atividade hotu-hotu konsentra iha Dili.
“Iha sidade Dili nakonu dezafiu ameasa ho krimi no violensia oin-oin hanesan krimi ofensa integridade fizika simples, maustratu konzuje, violensia domestika, danu agravadu simples, kontra bandu, abuzu sexual ba minoridade no seluk tan,” nia esplika.
Nia deklara, ho nunee Membru PNTL Komando Munisípiu Dili tenke marka prezente ho profisional, umanizmu no firmi nafatin hodi garante seguransa sidadaun hotu-hotu iha kapital Dili.
“Atu halo seguru Dili mak tenke aumenta frekuensia patrulhamentu, no prezensa Polisia iha terenu, no hametin koordenasaun ho F-FDTL, no servisu hamutuk ho governu lokal sira optimizasaun ba teknolojia, no halakon krimi kobra ilegal no gen motorista sira, krimi organizadu no bandidu sira neebe perturba komunidade,” nia informa.
Nia mos husu Membru PNTL tenke firme hodi maneza manifestasaun sira, ho mantein koordenasaun ho komunidade, autoridade lokal sira no media sira no elementu hotu-hotu.
“Tan nee, mai Ita hotu-hotu servisu hamutuk atu mantein sidade Dili seguru no hakmatek no seguru. Ita hotu fiar katak ho ita nía kompromisu no lealidade bele kompleta knaar boot sira nee ho diak,” nia deklara.
Nia koalia, promosaun deviza nee sai hanesan ponte motivasaun no inspirasaun ida atu hametin etika servisu nomos enkoraja atu hadia dezempenhu servisu, dedikasaun hodi sai hanesan elementu importante bá dezenvolvimentu PNTL.
“Ita husu atu membru idak-idak hadia liu tan servisu, tanba knaar no dever neebe mak atribui ba komando Munisípiu Dili atu mantein seguransa no ordem publika, hodi aplika lei no atendimentu bá komunidade munisípiu Dili,” katak nia.
Nia argumenta, ba membru PNTL sira ba oin hatudu responsabilidade durante halo funsaun kontinua hatudu leyalidade, respeita irarkia, hatudu disipliña ba Komandante sira hodi servi institusaun PNTL ho diak liu tan.
“Husu ba imi aumenta deviza aumenta responsabilidade, tanba ne’e tenke hatudu profisionalidade, respeita, loyal ba irarkia Komando,” nia sujere.
Iha fatin hanesan, Ministru Interior (MI) Francisco da Costa Guterres hateten, Governu ho estadu iha obrigasaun tomak hodi fó onra ba servisu sira neebe instituisaun PNTL halo.
“Iha situasaun defisil neebe imi hakat liu ona, apresia tanba imi servisu tau importânsia aas liu imi nian aan hodi defende estadu no nasaun ida nee. Tan nee imi merese simu promosaun ida nee,” nia koalia.
Governante nee husu ba Komando atu kria nafatin kondisoens hodi halo kontinuasaun ba formasaun ba membru sira neebe mak promovidu ona nunee nafatin iha kapasidade hodi lidera Institutuisaun PNTL.
Nia koalia, Ezekutivu ne’e nafatin ezije servisu PNTL nian, hodi servi povu no nasaun ida nee ho diak liu tan ho papel neebe rigor no disiplina, tanba Governu sei la tolera membru ida deit viola regra disiplina iha PNTL nian.
Nunee mos Visi Primeiru Ministru Asuntu Sosiál no Ministru Dezemvolvimentu Habitasaun Rurál, Mariano Assanami Sabino informa, promosaun deviza sira hanesan nee ba membru PNTL nee importante tanba tempu ona profisionaliza PNTL.
“Tanba PNTL nudar institusaun ne’ebé hola responsablidade vitál ba seguransa interna nasaun nian tenke profional iha nia atuasaun sira tanba agora mos ita atu tama ASEAN tanba servisu PNTL importante, tanba nee ho promosaun ida nee nudar parte ida oinsa profisionaliza ita nia PNTL atu prepara sira halo misaun seguransa ba povu no nasaun inklui iha rejiaun ASEAN nian,” nia afirma.
(jen)
