DILI, STLTIMORLESTE.com – Segundu Komandante Jerál Polísia Nasional Timor Leste (PNTL), Komisariu Polísia Pedro Belo husu ba Membru PNTL katak, aumenta diviza aumenta mos responsabilidade iha Instituisaun PNTL nian.
Nia dehan, iha mumentu serimonia Impozisaun Diviza Promosaun Tranzitoriu no Promosaun Atividade ba membru PNTL husi Sarjentu too Ofisial Superior nee importante tebes ba nasaun no povu ida nee.
“Mumentu ida nee sai mumentu espesial ida ba ita hotu katak, aumenta diviza aumenta ita nia responsabilidade no balun mos sai Komandante hodi asumi kargu importante iha PNTL, mak ita tenke nafatin aprende sensia polisia hodi dezenvolve ita nia kapasidade liderasan no vizaun neebe diak hodi dezenvolve PNTL,” hatete Segundu Komandante Jerál PNTL, Komisariu Polísia Pedro Belo liu husi nia deskursu iha serimonia Impozisaun Diviza Promosaun Tranzitoriu iha Komando Jeral PNTL Kaikoli, Dili, segunda nee (05/05/2025).
Nia tenik, permite membru PNTL sira hodi rekonhese valoriza importansia husi IX Governu Konstitusional hodi implementa reforma estrutural PNTL liu husi planu estratejiku husi seguransa externa periodu 2011 too 2030.
Nia esplika, kontinua sustenta ba reforma no dezenvolvimentu iha Instituisaun PNTL hanesan forsa esensial hodi garante seguransa no pas ho profisional no moderna. Tanba nee Aprovasaun Dekretu Lei Nu. 35/2004 iha 18 Outubru neebe estabelese iha estatutu PNTL.
Nia esplika, Ministeru Interior (MI), Francisco da Costa Guterres inisia ho rigor ho prosesu estruturadu hodi implementa promosaun tranzitoriu neebe prevista iha artigu 155, metodolojia hira neebe adapta iha implementasaun. Promosaun Tranzitoriu hanesan halo sosializaun husi nivel Komando Nasioanl, Nivel Unidade no Nivel Komando Munisipiu.
Nia informa, kada modalidade neebe prienxe sei hili uniku modalidade neebe mais benefisia, instrumentu legál ida nee hodi responde ba lakunas sira neebe eziste iha asuntu sira ba promosaun PNTL afeitadu dezde restaurasaun diviza iha tinan 2010.
“Ita haktuir artigu 89 estatutu ba PNTL ba membru neebe hasoru problema disiplinar no hetan kualidade hanesan ásidu iha prosesu krimi hein desizaun natureza kriminal,” nia deklara.
Nia koalia, priviléjiu boot ba IX Governu Konstitusionál partikulamente ba Permeiru Ministru Kay Rala Xanana Gusmão neebe aprova ona regulasaun nu. 19/2025 ba modalidade promosaun tranzitoriu PNTL iha Konselhu Ministru 19 Marsu 2025.
“Nunee ita hotu hatene no asiste iha Aniversáriu PNTL ba 25 neebe realiza iha Palasiu Governu, no realiza duni promosaun tranzitoriu ba membru PNTL sira neebe reprezeta ona promosaun diviza Superintendente Asistente, Inspitor Xefe, Serjentos Xefe, no permeiru Sarjentus,” nia deklara.
Nia hatutan, iha promosaun tranzitoriu ida nee nuudar rekonhesimentu ba membru PNTL neebe fo ona ninia dedikasaun neebe firmeza iha dezempenhu funsaun, demonstra, korajen no profesionalizmu hodi prezenta paz no orden.
“Kontinua mutiva kareira profisional kada membru PNTL, ho ida nee ohin loron ita realiza serimonia hasae diviza ba membru PNTL atu imi hotu mantein responsabilidade ba diviza neebe imi simu, ita hotu tenke simu realidade ba iha mudansa ida nee, tanba nee ita mós nafatin disiplina no respeita malu, espíritu kamaradazen loialidade ba superior sira,” katak nia.
Iha fatin hanesan, Visi Primeiru Ministru, Francisco Kalbuadi Lay esplika, wainhira komemora aniversáriu PNTL ba dala 25 mos iha membru PNTL balun sae diviza no ohin mos hasae diviza, tanba nee Governu fo parabens ba Membru PNTL neebe ohin aumenta diziva.
“Ba sira neebe ita hotu-hotu asiste ohin no simu diviza foun, tanba nee parabeniza ba imi hotu,” nia deklara.
Nia informa, prestasaun servisu excelente no profisional sai hanesan patamár iha Instituisaun PNTL nomos ho nia membru sira hotu hodi mantein nafatin knaar no responsabilidade servisu profisional no excelente neebe iha interese dezenvolvimentu paz no estabilidade ba seguransa nasionál.
Nia koalia, PNTL hanesan pilar primeiru iha aspetu seguransa nasionál no seguransa interna hamutuk ho pilar seluk-seluk Estadu ninia.
Governante nee esplika, liu husi Ministru Interior garante ninia komitmentu kompromisu neebe boot husi mantein hodi kontinua, dezenvolve iha setor seguransa, komitmentu no kompromisu nasional ida neebe inisiu kedas.
“Hau atu dehan katak, objetivu estratejiku ida husi planu estratejiku too 2030 nian, ba segurasan internu ninia mak kontinua haforsa iha reforma dezenvolvimentu Instituisaun PNTL nuudar forsa seguransa ida neebe profisional no modernu hodi mantein lei no orden,” nia hatutan.
Nia afirma, deside hodi implementa programa promosaun tranzitoriu ba membru PNTL sira, neebe liu husi promosaun Tranzitoriu artigu 155, konaba Estadu Polisia no Estatutu PNTL neebe loke dalan no fo oportunidade ba implementa promosaun tranzitoriu.
(jen)
