DILI, STLTIMORLESTE.com – Lezadu ho inisial MJ husu atu perdua arguidu sira ho inisial JS, ACX, DJB, JMT no NS, maibe husu arguidu sira tenke taka fali kanek neebe iha.
Iha sala julgamentu laran loron Segunda, Juiz Prosesu Ivan Patrocenio deklara katak, krimi refere ho nia natureza semi publiku lei fo dalan atu bele dada fila, kuandu vitima ba iha prosesu nee aseita.
Tentativa konsiliasaun iha sala julgamentu laran, lezadu mos aseita atu dada fila krimi nee, maibe lezadu husu atu arguidu sira taka kanek neebe lezadu hetan, tanba durante nee lezadu hasai osan mak halo tratamentu. Ho nunee lezadu husu atu taka ho montante US$ 100.
Ho ida nee, arguidu sira mos aseita atu taka prosesu refere no arguidu sira prontu fo osan neebe mak lezadu husu.
Rona tiha lezadu no arguidu sira nia deklarasaun, Ministeriu Publiku no Defeza husu Tribunal atu omologa prosesu nee no absolve arguidu husi instansia.
Rona tiha ida nee, ikus mai Juiz prosesu deside absolve arguidu husi krimi refere no absolve arguidu husi instansia.
Tuir akuzasaun neebe iha katak, iha loron 14 fulan Outubru tinan 2024, iha oras maizumenus 18h56, iha Bairo Pite, Dili, momentu neeba arguidu JS ba kuru hela bee.
Bainhira arguidu JS kuru bee, derrepente deit lezadu mos hase ona arguidu no tolok ona arguida AC, nunee arguidu JS ho nervozu uza duni balde ida hodi baku kona iha lezadu nia kotuk laran dala haat.
Bainhira arguidu JS baku hela lezadu, nunee mosu tan mai arguida AC uza liman hodi tuku kona mos dala ida iha lezadu nia hasan.
Tanba mosu ona problema, nunee arguidu sira mak hanesan DJB, arguidu JM no arguidu NS mosu tan mai iha fatin problema.
Tanba arguidu sira nee haree lezadu tolok fali sira nia inan, nunee ho nervozu arguidu DJB uza fatuk ida tuda kona iha lezadu nia matan fukun kauza kanek, hafoin arguidu JM no arguidu NS uza stik ida no aisar ida baku kona iha lezadu nia ulun kauza kanek no halo mos ran sai barak.
Motivu husi problema nee tanba arguidu sira dada fali bee husi lezadu nian, ho nunee mak lezadu mos tolok ona arguidu sira, hafoin mosu ona agresaun fizika hasoru lezadu.
Konsekuensia husi arguidu sira nia hahalok nee mak halo lezadu sente moras no kanek iha ulun, kotuk laran no hetan mos suku pontu lima iha lezadu nia ulun.
Arguidu sira halo ho forma livre, deliberada no konsiente, hatene momos (ben sabendo) katak, uza aisar, uza stik hodi baku no fatuk hodi tuku bele halo moras no kanek, hanesan meus ou instrumentu ida neebe mak aptu no adekuadu.
Arguidu sira mos hatene hela katak, hahalok sira nee proibidu tuir lei penal, tanba nee arguidu sira JS, ACX, DJB, JMT, no NS, hanesan ko-autor material ba pratika krimi ofensa ba integridade fisika simples tuir artigu 145.
Audensia Julgamentu nee Prezidente husi Juiz singular Ivan Suritay, Ministeriu Publiku reprezenta husi Prokurador Hernani Rangel, arguidu sira hetan asistensia legal husi Defensor Publiku Ancelmos.
(ter)
