DILI, STLTIMORLESTE.com – Relasiona ho Tribunal aplika pena suspensaun ba arguidu inisial MSC neebe soke mate Zizelma Maria Fatima Verdial Gonsalves mosu preokupasaun iha sosiedade nia leet kona-ba desizaun nee, tanba nee Jurista konsidera Konselhu Superior Majislatura Judisial (KSMJ) bele foti inisiativa, hodi haruka Inspetora sira halao investigasaun kona-ba desizaun nee.
Tuir Jurista Sergio Dias Quintas katak, mezmu Tribunal sira independente no sira sei halo tuir deit Lei Inan no lei oan sira, konforme iha artigu 119 KRDT, maibe tanba desizaun ba kazu Zizelma hamosu ona polemika no preokupasaun mak presiza investigasaun.
“Pertinente tebes bainhira Konselhu Superior Mazistradu Judisial (KSMJ) foti inisiativa ruma, hodi oriente servisu inspetoria Tribunal nian halo investigasaun ba kazu refere, tanba liu husi servisu inspetoria nia mak bele deskobre desizaun nee los ka.lae,” dehan Jurista Sergio Dias Quintas ba STL iha Tribunal, Dili, Tersa (01/03/2025).
Nia hatutan, ida seluk tan mak Ministeriu Publiku no asistente iha dever hodi esplika ba familia Zizelma nian katak, prosesu ida nee seidauk hotu, sei halo rekursu iha loron 30 nia laran.
No KSMJ nee orgaun jestaun no disiplina ba Juiz sira, tanba nee sira mos bele koalia kona-ba kestaun sira nee.
Iha fatin ketak, Akademiku Universidade Nasional Timor Lorosae (UNTL), Rafael de Jesus dehan, publiku sira nia preokupasaun husu atu Konselhu haree mos servisu autoridade judisial sira nian.
“Konselhu mak kontrola servisu sira neebe iha, tanba nee desizaun ruma mosu preokupasaun iha sosiedade Konselhu mos tenke haree ba ida nee,” dehan nia.
Nia dehan, ema barak hakarak lori prosesu ba iha Tribunal hodi buka justisa, tanba nee se justisa nee sira la aseita mosu preokupasaun ka duvidas iha sira, konselhu mos bele haree ba ida nee.
(ter)
