BAUKAU, STLTIMORLESTE.com – Peskadores iha Munisipiu Baukau enfrenta ekipamentu peska nian, hodi halao atividade peskas iha tasi laran sustenta ekonomia familia.
Xefe Grupu Peskadores Saewataisi iha Postu Administrativu Laga, Orasio Gaio Ximenes hateten, vida peskador buka moris iha tasi laran, tanba nee tenke iha ro’o modernu no ekipamentus peskas nian seluk tan hafoin bele tama ba tasi laran buka ikan lori sai mai liur faan ba kompradores sira hodi sustenta ekonomia familia.
Maibe durante nee peskadores sira iha Postu Administrativu Laga, Munisipiu Baukau infrenta problema mak hanesan peskadores balu iha ro’o ho makina no kompleta ho ekipamentus seluk tan, enkuantu peskadores balu iha ro’o no ekipamentus seluk tan, maibe laiha makina atu funsiona ro’o tama ba tasi laran.
“Agora daudaun barak mak lakompletu, tanba balu ro’o laiha, balu ro’o iha maibe motor laiha no balu iha motor laiha ro’o balu laiha hotu, ro’o balu motor laiha sira ian deit bainhira laloran boot maluk seluk mak ajuda,” dehanr Orasio ba jornalista sira, bainhira partisipasi workshop neebe JICA no MAPFF realiza, iha Sentru Konvensoens, Vila Antiga, Baukau, Kuarta (22/10/2025).
Nia komenta, mezmu peskadores sira iha Postu Laga liu liu pertense ba grupu Saewataisi barak mak infrenta problema, tanba menus ekipamentus, maibe nafatin obriga aan tama tasi buka ikan, tanba nesesidade ekonomia familia.
Nunee ro’o neebe eziste iha grupu Saewataisi hamutuk unidade 10 balu kondisaun la favoravel ona atu utiliza halo peskas iha tasi laran, tanba nee hanesan Xefe Grupu relata ona pedidu ba parte kompetente atu halo manutensaun ba makina no ro’o sira, maibe seidauk iha resposta.
“Ro’o sira nee balu osan iha hadia maibe balu osan laiha nee mak rai deit, liu husi meius ida nee ami husu se bele karik diresaun bele ajuda lalais haruka tekniku para hadia ami nia ro’o no motor sira neebe mak avaria ona no bele apoiu material seluk,” Orasio rekomenda.
Enkuantu Peskador husi Postu Administrativu Vemasi, Marcelo Freitas salienta, komunidade iha Vemasi parte tasi nian maioria moris vida peskadores, maibe durante nee infrenta problema, tanba ro’o no makina neebe iha maioria avaria ona.
“Ami sempre hatoo pedidu ba diresaun peska, tanba Governu dehan tenke hatoo pedidu atu bele haruka tekniku sira ba haree, sira ba haree duni foti fila fali ro’o no makina neebe mak aat atu hadia fila fali ba peskador sira nian,” Marcelo katak.
Peskador nee komenta, ro’o neebe eziste iha tasi Vemasi hamutuk 10 resin balu apoiu husi Governu no balu peskadores sira sosa rasik neebe durante nee avaria hetan ona manutensaun husi tekniku sira husi Ministeriu Agrikultura Pekuaria Peskas no Floresta, tanba bainhira ro’o ida avaria difikulta komunidade peskadores sira.
Hatan ba kestaun nee Xefe Departementu Peskas iha Diresaun Servisu Munisipal Agrikultura Baukau Martino Ximenes hateten, relasiona preokupasaun peskadores nian neebe durante nee infrenta problema kona-ba ro’o avaria, parte tekniku sira sempre halo manutensaun.
“Ro’o balu neebe avaria ita iha teknik rasik husi Ministeriu iha Vemasi teknik ida neeba sira kontaktu ba hadia, maibe balu susar tebes atu hadia fila fali, tanba avaria total, tanba makina uza ba tasi laran nee nia durasaun minimu tebes, tanba nee ami sempre hatoo ba peskador sira makina neebe iha hatoo lalais,” hatete Martino.
Xefe Departementu nee komenta, makina neebe utiliza ba ro’o hodi sirkula iha tasi laran nia durasaun tempu ba avaria nian minimu tebes, tanba nee husu peskadores sira bainhira ro’o iha ona sinal ba avaria nian informa lalais ba Dirasaun Peskas hodi orienta ekipa tekniku ba halo manutensaun sedu hodi la infrenta ba kategoria avaria total nian.
Enkuantu ro’o seluk hanesan informasaun husi Postu Administrativu Laga neebe avaria ekipa tekniku seidauk halo manutensaun, tanba parte peskador sira la fo informasaun ba Diresaun Peskas iha nivel Munisipiu.
Tanba nee husu peskadores sira iha Munisipiu Baukau, bainhira kondisaun ro’o iha sinal ba avaria informa lalais ba Dirasaun Peskas hodi orienta ekipa tekniku halo manutensaun ba ro’o hodi la kauza ba avaria total.
Entretantu grupu peskadores neebe eziste iha Munisipiu Baukau hamutuk 13 rejistu husi Postu Administrativu Laga, Baukau Vila no Vemasi.
Jornalista: Tomas Reis
Editora: Carme Ximenes
