BAUKAU, STLTIMORLESTE.com – Pesoal servisu iha kartoriu Parokia Santa Terezinha Kelikai ida struk, atendimentu sertidaun batizmu ba SDC nia oan la realiza, SDC hirus halo agresaun fiziku hasoru Padre Parokia David Savio, asaun nee Padre Parokia perdua, maibe prosesu kontinua ba oin tanba rona husi parte Dioseze.
Padre Parokia Santa Terezinha Kelikai, David Savio, SBD vitima ba asaun SDC haktuir, iha loron 12 Maiu 2025 dader, SDC prezensa iha kartoriu Parokia Kelikai, objetivu atu foti oan nia sertidaun batizmu, maibe servisu kartoria seidauk labra dadus husi ficha pastoral iha livru asentu Parokia nian, tanba nee halo SDC emosaun.
SDC emosaun, tanba nia oan sarani liu ona fulan hitu no Sentru Pastoral relata ona ficha ba kartoriu Parokia Kelikai, maibe parte kartoriu seidauk labra iha livru asentu Parokia nian.
“Hau mai nia husu kedas ida nee, tanba sa mak hau nia oan sarani liu tiha ona fulan hitu, maibe nia naran seidauk hakerek iha livru asentu. Nee mak hau dehan deskulpa, ami mos hakaas aan atu halo ida nee, maibe ami nia staff tau matan kona-ba ida nee derepende struk labele tan servisu hela deit iha uma, hau hakaas aan buka ema atu troka, maibe seidauk hetan ema,” haktuir David Savio ba jornalista sira iha Vila Nova, Baukau, Tersa (13/05/2025).
Hafoin SDC rona tiha esplikasaun refere husi Padre Parokia Santa Terezinha Kelikai, SDC hatan ho liafuan, servisu fasil hela no too ona fulan hitu, maibe naran seidauk hakerek iha livru asentu Parokia nian nee la lojika.
Nunee SDC hirus hodi koalia no tenta rasta Padre Parokia David Savio nia kamizola konsege lees, maibe Padre Parokia nee konsege hakalma liu husi hatan ho liafuan, asaun neebe halo responsabiliza iha Maromak nia futar oin, tanba lia loos hotu iha Maromak.
“Hau dehan tiha ida nee nia (SDC) hakfodak hakuak hau husu deskulpa, rein hau nia ain husu deskulpa, maibe hau dehan laiha buat ida, hau buka dalan hatan nesesidade sertidaun nee hau sei halo fo ba o, nia sei hakuak hau polisia too,” konta Padre David.
Kontaktu Polisia too fatin hodi evakua SDC, Padre Parokia David Savio SBD nuudar vitima la hatene, maibe derrepente deit haree parte polisia too iha momentu SDC rekonhese aan sala hodi monu ain.
“Perdua sempre perdua, hau laiha problema ho ida nee, maibe bibi atan la hamriik mesak, hamutuk ho bibi sira, tanba ida nee ita hamutuk hanoin oinsa buat nee lao sai diak, buka maneira neebe diak atu bele rezolve problema ida nee tempu mai karik buka komprende malu, ita mak sarani servisu hamutuk, problema saida deit ita hatan hamutuk,” Padre David korajen.
Padre David konfesa, perdua suspeitu SDC nuudar reprezentante pesoal, maibe hanesan Padre Parokia la hamriik mesak, tanba hamutuk ho sarani sira iha Parokia Santa Terezinha Kelikai, nunee solusiona kazu refere liu husi dalan legal, nunee futuru Parokia ho sarani servisu hamutuk fo solusaun ba preokupasaun sira neebe enfrenta.
“Hau servisu nuudar paroku iha duni Amu Bispu nia okos, iha mos hau nia providensia, nee duni buat hotu nia kriteriu nee iha, hau pesoal horiseik deskulpa hau simu, maibe hanesan bibi atan servisu em nome de dioseze, hau rona hau nia maluk sira,” Padre David komfesa
Bibi atan Parokia Kelikai nee argumentu, atu fo solusaun ba kazu refere, kargu Padre Parokia Santa Terezinha Kelikai halao servisu iha Dioseze Baukau nia okos, tanba nee buat hotu tuir nia kriteriu. Nunee perdua malu reprezentante pesoal, maibe servisu hanesan bibi atan ho naran Dioseze, providensia no kongreasaun nian sei rona husi parte sira nee hotu.
Liga asuntu nee, STL tenta konfirma Bispu Dioseze Baukau, Dom Leandro Maria Alves, maibe tuir informasaun husi limpezador, Bispu Dioseze Baukau sei iha Dili.
(tom)
