BAUKAU, STLTIMORLESTE.com – Politika Governu liu husi Ministeriu Administrasaun Estatal (MAE) rekruta pesoal nain 4 hodi apoiu servisu iha kada suku, iha Suku Alaua Kraik, Postu Administrativu Baguia seidauk iha konhesimentu klean kona-ba utiliza komputador.
Xefe Suku Alaua Kraik, João Baptista Antonio Alves esplika, pesoal nain haat kompostu Sekretaria Suku, Administrasaun Suku, Finansas Suku no Asuntu Sosial Suku neebe ministeriu fo rekruta hodi destaka iha kada suku sira inklui iha Suku Alaua Kraik diak, tanba bele fasilita servisu suku, maibe iha impaktu balun, tanba menus konhesimentu.
“Sira iha konhesimentu menus, tanba nee husu apoiu formasaun oinsa mak bele haklean komputador neebe mak iha,” hateten João ba jornalista STL iha Vila Antiga, Tersa (01/04/2025).
Nia sublina, kona-ba ekipamentu hanesan komputador no seluk tan iha Suku Alaua Kraik sufisiente ona hodi utiliza ba servisu atendimentu publiku, maibe iha impaktu, tanba pesoal apoiu suku sira laiha konhesimentu klean hodi opera komputador aselera atendimentu publiku iha Suku.
Tanba nee husu Ministeriu Administrasaun Estatal atu kria politika hodi fasilita formasaun ba pesoal sira kona-ba operasaun komputador nian, nunee la difikulta servisu atendimentu publiku.
Hatan ba kestaun nee, Ministru Administrasaun Estatal, Tomas do Rasario Cabral hatete, potilika Governu destaka pesoal apoiu servisu iha nivel suku apoiu mos ekipamentus hanesan komputador hodi halao servisu, nunee husu atende asuntu atendimentu publiku iha nivel Suku.
“Ita iha ona manual, hein atu halo formasaun, maibe sira bele mai aprende iha balkaun uniku,” hateten Ministru Tomas.
Governante nee hateten, kona-ba fasilita formasaun ba pesoal apoiu servisu suku nian ekipa prepara ona manual hodi implementa formasaun, maibe diak liu husu pesoal apoiu servisu suku bele tuir formasaun iha edifisiu Balkaun Uniku neebe Governu estabelese ona iha Baukau.
(tom)
