DILI, STLTIMORLESTE.com – Iha semana kotuk liu ba Bankada Partidu Libertasaun Popular (PLP) iha Parlamentu Nasional liu husi Deputada Maria Angelina Sarmento kestiona makaas kona-ba Pesoal Saude sira neebe over time iha Departamentu Emerjensia Hospital Nasional Guido Valadares (HNGV) seidauk simu osan turnu ka over time tinan 2024 too 2025, maibe HNGV rejeita informasaun nee la loos.
Diretor Servisu Apoiu Diagnostiku no Terapeutiku iha HNGV, Vidal de Jesus Lopes hatete, preokupasaun neebe deputada sira iha Parlamentu Nasional (PN) hatoo katak, Pesoal Saúde iha Departamentu Emerjensia HNGV neebe la simu direitu over time husu fulan Junhu too Dezembru nee la loos.
“Ita Pesoal Saude iha Departamentu Emerjensia neebe laiha direitu ba over time husi fulan Junhu too Dezembru nee la loos, tanba ita konfirma ho parte rekursu umanu no finansas katak fulan rua deit mak seidauk simu husi Novembru too Dezembru tinan kotu,” hatete Vidal iha Hotel Timor, Dili, Kuarta (12/03/2025).
Nia esplika, maske Governu selu tarde over time tinan kotuk nian, maibé sei selu, tanba sei iha prosesu nia laran.
Maibe direitu neebe sira simu nee over time ho turnu, mais saláriu vensimentu lao nafatin hanesan baibain, tanba nee informasaun neebe deklara iha PN nee la loos.
“Hau koalia, nee selu tarde mos sei selu, tanba prosesu lao hela, ita utiliza osan HNGV, tanba sei iha prosesu nian laran,” nia deklara.
Iha fatin ketak, Fontes Konfirmadu iha Farmasia Emerjensia HNGV esplika, kona-ba over time hahu iha fulan Novembru too Dezembru tinan 2024 nian seidauk selu too agora.
“Ami nia over time tinan kotuk nian mak seidauk selu, maibe fulan ida nee selu ona, mais sente triste oituan, tanba over time tinan kotuk nia selu uluk ona, maibe fulan ida selu ona, tanba nee ami hanoin sira la selu ona,” nia afirma.
(jen)
