DILI, STLTIMORLESTE.com – Publiku barak kestiona kona-ba prosesu roo Haksolok, tanba nee Prokurador deklara katak, prosesu refere iha hela prosesu investigasaun.
“Iha faze investigasaun hela, hau mos komprende ema barak lamenta ho kestaun roo Haksolok, maibe kazu ida nee iha hela faze investigasaun, rekolha dokumentus tuir nia tramitasaun neebe maka iha,” dehan Prokurador Jeral Republika, Nelson De Carvalho ba jornalista sira iha Salaun Mauhoka, Surikmas, Tersa nee (05/08/2025).
Iha fatin ketak, Jurista Jose Maria Guterres dehan, problema roo Haksolok sai preokupasaun ema hotu nian, maibe tau fiar ba autor judisiariu sira hodi halao servisu.
“Tau fiar ba iha autor judisiariu sira hodi halao servisu, too iha loron ida sira bele konklui investigasau,” dehan nia.
Nia hatutan, prosesu nee lao kleur ona, tau konfiansa ba iha autor judisiariu sira, ho sira nia matenek neebe iha bele konklui lalais investigasaun.
Aleinde nee Akademiku UNTL, Rafael de Jesus dehan, kazu sira neebe dada atensaun publiku nian presiza investiga ho klean.
“Ita haree prosesu nee dada tebes atensaun publiku nian, tanba nee presiza halo investigasuan ho lais, hodi nunee loron ida publiku bele hatene nia rezultadu nee lao oinsa,” dehan nia.
Informa tan, Prokurador presiza servisu hamutuk ho KAK, PSIK, hodi bele konklui investigasaun ba prosesu refere.
(ter)
