DILI, STLTIMORLESTE.com – Ministru Juventude Desportu Arte no Kultura (MJDAK), Nelio Isac hatete, kona-ba planu governu harii estadiun futebol iha Tasi-Tolu oras nee nia prosesu lao hela.
Nelio Isac Sarmentu hatoo kestaun nee ba jornalista iha Palasiu Prezidensial Nicolau Lobato, Bairo Pite, Segunda (13/10/2025).
Nia hatete, konaba planu harii estadiun iha Tasi-Tolu oras nee prosesu lao hela.
“Estadiu Tasi-Tolu nee too agora prosesu kontinua lao hela, tanba ohin hau dehan diskusaun prinsipal neemak diskusaun ekonomiko, tanba hau esplika bebeik ona intensaun harii iha Tasi-Tolu nee laos obra ida Governu nia ba harii ona, maibe nia intensaun nee mai husi federasaun footbal hakarak dezenvolve estadiu ida, mais nee setor publiku katak Governu tau osan setor privadu sira mos tau osan hamutuk mak atu dezenvolve ba oin,” dehan nia.
Nia katak, kuandu tama ho Sistema ida hanesan nee Ministru Planeamentu Estratejiku mak hatene, tanba iha PP nee iha planu estratejiku ida buat ruma diak ba nasaun.
“Klaru prosesu lao, ami mos rona preokupasaun balun mai husi sosiedade sivil ita tetu hotu para halo diskusaun, maibe too ikus iha buat ruma klaru sei iha pronunsia, maibe hau sente katak Ministru relevante Ministru Planeamentu Estratejiku nia mak tangani hela situasaun nee. Espera katak, semana ka fulan hira mai tan ita bele iha rejultadu iha Tasi-Tolu,” dehan Ministru nee.
Nia hatete, sei husu nafatin ba ministeriu relevante, tanba oras nee sira halo diskusaun hela kordena ba malu, kordena entre ho ministeriu relevante sira hanesan Ministru Justisa, Ministru Desporto nomos FFTL rona mos opiniaun husi sosiedade sivil nia too bainhira tuur hamutuk fali mak foti desizaun.
Nunee mos Peskizador Asia Justisa and Rights (AJAR), Inocencio de Jesus Xavier dehan, tuir nia haree fatin Tasitolu fatin neebe relijiozu, no fatin istoriko ba TL, tanba nee la merese harii estadiu football iha fatin refere, governu bele deside fatin seluk.
Jornalista: Emerenciana Pinto
Editora: Domingas Gomes
